Поранешниот полски министер за правда Збигњев Зјобро е во САД откако избегал од Унгарија. Полска најавува барање за екстрадиција и објаснување како влегол без важечки документи.
Поранешниот министер за правда на Полска, Збигњев Зјобро, кој е обвинет за повеќе кривични дела во неговата татковина, потврди дека од Унгарија отпатувал во Соединетите Американски Држави. Изјавата ја даде во неделата за десничарската телевизија „Република“, по претходни медиумски објави.
„Се наоѓам во Соединетите Американски Држави. Пристигнав вчера и ова ми е трет пат да патувам низ земјата“, изјави Зјобро.
Зјобро, кој минатата година доби азил од владата на Виктор Орбан, се соочува со затворска казна до 25 години во Полска доколку биде осуден. Обвиненијата вклучуваат злоупотреба на службената положба, раководење со организирана криминална група и користење средства наменети за жртви на криминал за набавка на израелскиот шпионски софтвер „Пегасус“, со цел наводно следење политички противници.
Политички промени во Унгарија
По изборите во април, на кои партијата на Орбан ја загуби власта, новиот унгарски премиер Петер Маѓар, кој положи заклетва во саботата, најави прекин на политиката на заштита на лица барани од други држави.
„Унгарија повеќе нема да биде засолниште за меѓународно барани криминалци“, изјави Маѓар пред новинарите, наведувајќи ги како пример Зјобро и неговиот поранешен заменик Марчин Романовски, кој е осомничен за проневера на речиси 40 милиони евра.
Збигњев Зјобро и неговиот поранешен заменик Марчин РомановскиЗбигњев Зјобро и неговиот поранешен заменик Марчин Романовски
Телевизијата „Република“ претходно објави дека Зјобро се наоѓа во САД. Либералниот канал ТВН24 објави фотографија од него на меѓународниот аеродром „Њуарк Либерти“, за која се наведува дека е направена од друг патник.
Сè уште не е јасно како Зјобро успеал да отпатува во САД, бидејќи Полска претходно соопшти дека неговите патни документи, вклучувајќи го полскиот и дипломатскиот пасош, биле одземени. Според локалниот портал „Онет“, тој добил американска новинарска виза поврзана со телевизијата „Република“, која подоцна објави дека го ангажирала како политички коментатор во САД.
Полска најавува дипломатски чекори и можна екстрадиција
Актуелниот полски министер за правда Валдемар Журек на платформата „Икс“ напиша дека Полска ќе се обрати до властите во САД и Унгарија со барање за објаснување за правната основа која му овозможила на Зјобро да влезе во САД без важечки документи.
„Нема да престанеме со напорите да обезбедиме тој и Марчин Романовски да одговараат пред полското правосудство“, наведе Журек.
Тој претходно изјави дека, доколку се потврди дека Зјобро се наоѓа во САД, Полска ќе побара негова екстрадиција.
Зјобро беше лидер на ултраконзервативната партија „Суверена Полска“, коалициски партнер на националистичката партија „Право и правда“ (ПиС), и ја извршуваше функцијата министер за правда и државен јавен обвинител од 2015 до 2023 година. Тој е познат и како клучен креатор на контроверзните реформи во судството, кои предизвикаа судир меѓу Полска и Европската комисија.
На прашањето за можната екстрадиција, Зјобро изјави дека е подготвен да се појави пред суд. „Подготвен сум да се соочам со секој суд, а американскиот суд несомнено е независен суд“, рече тој, додавајќи дека постапките за екстрадиција во САД се сложени.
Тој ги отфрли сите обвиненија, обвинувајќи ја центристичката полска влада дека спроведува „лов на вештерки“ против конзервативците.
