Генералното собрание на Обединетите нации, вчера, изгласа резолуција со која се бара итно повлекување на руските војници од Украина и прекин на воените дејствија, со која што, на ден пред првата годишнина од агресијата, испрати силна порака за изолација на Русија на меѓународната сцена.
За резолуцијата која повикува на „сеопфатен, праведен и траен мир“ гласаа 141 земја, 32 беа воздржани, а шест ѝ се придружија на Русија гласајќи „против“.
Со тоа, Генералното собрание на ОН со големо мнозинство ја изолираше Русија, донесувајќи ја резолуцијата непосредно пред годишнината од инвазијата што ја започна на 24 февруари 2022 година.
Текстот е изгласан само еден ден по посетата на шефот на кинеската дипломатија на Москва, каде што вети подлабоко партнерство со Русија.
Кина се воздржа од гласањето, што е четврти пат да постапува на ваков начин, откако Русија ја започна својата агресија над Украина.
Против резолуцијата гласаа Белорусија, Северна Кореја, Сирија, Мали, Еритреја и Никарагва.
Воздржани, освен Кина, беа Индија, Алжир, Јужна Африка, Етиопија, Иран, Казахстан, Узбекистан, Виетнам и Пакистан, и уште 22 други земји.
Резолуцијата е изгласана на првиот ден од дводневното заседавање, откако претходно на Генералното собрание се обратија десетици високи функционери, меѓу кои американскиот државен секретар, Антони Блинкен, британскиот министер за надворешни работи, Џејмс Клеверли и германската министерка за надворешни работи, Аналена Баербок.
Силниот резултат од гласањето е важен бидејќи ги побива сомнежите дека има замор од војната и дека поддршката за Киев слабее во некои делови од светот, посебно оние кои зависат од руските енергетски резерви.
Украинскиот министер за надворешни работи, Дмитро Кулеба, во средата ја обвини Москва дека извршила насилно депортирање на украински деца во Русија, нарекувајќи го тоа „геноцид“.
Рускиот амбасадор во ОН ги обвини Германија и Западот дека во конфликтот во Украина имаат мотиви слични на оние во Втората светска војна.
„Германските тенкови повторно ќе убиваат Руси“, рече тој, мислејќи на главните борбени тенкови „Леопард“ од германско производство што неколку европски земји ветија дека ќе ги испратат во Киев.
Германскиот канцелар Олаф Шолц, кој во сабота патува во Индија со цел да ја добие поддршката од земјата за Украина, во интервју рече дека воопшто не обесхрабруваат знаците дека големите економии во развој се двоумат да ја осудат руската агресија и заклучи дека „само неколку земји се на страната на Русија“.
Последниве месеци многу се разговараше за тоа колку далеку треба да оди резолуцијата на ОН по повод годишнината од војната. Киев работеше на резолуции во кои се споменува Трибуналот за воени злосторства, како и на текст што ќе го претвори мировниот план од 10 чекори на украинскиот претседател Володимир Зеленски во документ на ОН, според извори од ОН. И од двете идеи се отстапи.
(Фото: АФП / Тимоти А. Клери)
