По тридневни натегања во Собранието на координацијата меѓу пратеничките групи, договорено e претседателското место во Комисијата за прашања за избори и именување да го има ВМРО-ДПМНЕ.
На чело на Комисијата најверојатно ќе биде Илија Димовски.
Со ова е одблокиран процесот за продолжување на конститутивната седница на Собранието, која е закажана за в понеделник, кога треба да се избере собранискиот спикер.
Денеска на координативната средба меѓу партиите за формирање на Комисијата, СДСМ отстапи од своето барање претседател на Комиисијата да биде од парламентарното мнозинство со што беше удоволено барањетона ВМРО-ДПМНЕ претседателот да биде од партијата која има најмногу паретници во Собранието.
„Постигна е согласност за членовите и претседателот на Комисијата. Прифативме претседател да биде член од ВМРО-ДПМНЕ за да се откочат институциите, за да не бидат граѓаните заложници на ниеден политичар и политичка партија“, изјави генералниот секретар на СДСМ, Оливер Спасовски.
Претседателското место во Комисијата кое што го доби ВМРО-ДПМНЕ и шесте членови во Комисијата, како што вели Илија Димовски, не биле добар гест од страна на СДСМ, туку се правила и пракса која што во Собранието функционира 25 години.
„Во понеделник единствена точка по која Собранието ќе расправа и одлучува е изборот на составот на Комисијата за прашања на избори и именувања. Потоа според процедурата треба да се свика заседание на Комисијата за прашање и именувања, таму да се разгледаат еден, два три, десет или сто, предлози за претседател на Собранието и утврдениот предлог од Комисијата да се достави до претседавачот на конститутивната седница, и тогаш тој ќе може да свика седница за избор на претседател на Собранието“, изјави Илија Димовски од ВМРО-ДПМНЕ.
Тој не одговори на прашањето дали како партија тие ќе имаат свој предлог за претседател на Собранието.
Партиите три дена преговараа за претседател на Комисијата за избори и именување до која се доставуваат предлозите на партиите за претседател на Собранието кој треба да биде избран на конститутивната седница.
Во понеделникот партиите се договорија Комисијата да биде составена од 13 членови, ВМРО-ДПМНЕ да има 6, СДСМ 5, а ДУИ и Беса по еден член.
