Италијанската премиерка, Џорџија Мелони, вчера соопшти дека свикала министерска комисија за национална безбедност со цел нејзината влада поуспешно да се справи со проблемот со зголемениот број мигранти.
Италија има проблеми во згрижувањето мигранти кои доаѓаат од северна Африка и од Балканот, а италијанскиот Црвен крст побара посилна меѓународна реакција за „хаосот“ кој го предизвикуваат мигрантите.
Мелони после седницата на кабинетот соопшти дека го активирала Меѓуминистерскиот совет за безбедност на Републиката (ЦИСР), кој ќе остане трајно оперативен за да се реши проблемот со зголемениот број мигранти.
„Нашата цел е да го решиме проблемот на прагматичен начин, со брзи и координирани одлуки“, Џорџија Мелони
Според податоците на италијанското Министерство за внатрешни работи, во Италија лани стигнале околу 113.500 имигранти, додека оваа година од нив влегле околу 55.800.
Статистиките покажуваат дека во изминатите три дена имало најмногу, 2.300 во петокот, повеќе од три илјади во саботата и речиси илјада во неделата.
Италијанската влада ги ограничи активностите на спасувачките бродови на хуманитарните организации, запленувајќи минатата недела три нивни бродови.
Но, додека земјата се соочува со пад на бројот на жители и недостаток на работна сила, таа ја зголеми влезната квота за работници (мигранти) од земјите надвор од ЕУ на 452.000 за периодот 2023-2025 година, од околу 83.000 во 2022 година.
Вчера, 56 невладини организации издадоа заедничко соопштение во кое ја обвинија владата во Рим дека ја попречува работата на хуманитарните организации на море и предупредија дека заради тоа многу од нив, ако не и сите, би можеле да ги прекинат своите операции, што би можело да ги загрозат животите на мигрантите.
(Фото: Фети Белаид – АФП / Ремо Касили – Ројтерс)
