Фудбалерите на Манчестер Јунајтед извојуваа голема победа во 20. коло од Премиер лигата против градскиот ривал, Манчестер Сити. После голем пресврт, избраниците на Ерик тен Хаг ги совладаа „граѓаните“ со резултат 2:1.
„Црвените ѓаволи“ долги години во еден меч на чело со Пеп Гвардиола не влегоа со поголеми шанси и очекувања на јавноста дека би можеле конечно да му го земат скалпот на својот лут ривал.
Јунајтед одлично парираше во првите 45 минути, Луко Шо и Рафаел Варан го ставија „во џеб“ Ерлинг Холанд и ги затворија сите патишта до голот.
Убиствената офанзива на Сити практично беше без шанси во првото полувреме, но ништо подобро издание во напаѓачкиот сегмент не покажа ниту екипата од „Олд Трафорд“.
Мрежите мируваа до 60-тата минута кога Џек Гралиш го замолкна „театарот на соништата“. Влезе во 57. минута и само три минути подоцна, на асистенција на Кевин де Брујне, го смени резултатот на семафорот.
Се чинеше дека „граѓаните“ маршираат кон нови три бода, и дека ќе ги отпишат момчињата на Тен Хаг од шампионската трка.
И тогаш, од никаде, Каземиро упати совршена топка во просторот, на неа натрча Бруно Фернандеш и ја забива зад грбот на голманот Едерсон, со ерупција од воодушевување од домашните навивачи.
А, само четири минути подоцна, шок на лицето на Пеп Гвардиола. Јунајтед прави голем пресврт. Гарнако го пронаоѓа во шеснаесетникот Маркус Рашфорд, а суровиот егзекутор во негов стил ја претвора шансата во гол, за 2:1.
Детето на Јунајтед денеска беше крал на Манчестер, а со неговиот гол „црвените ѓаволи“ му се доближија на само еден бод заостаток на градскиот ривал.
(Фото: АП)
