Пред Договорот од Преспа да дојде во грчкиот парламент, Независни Грци ќе ја напуштат владата, а земјата ќе оди на избори, вели лидерото на партијата Панос Каменос, коалициониот партнер во грчката влада и министер за одбрана на Грција. Во интервју за радиото „Реал фм“, тој уште еднаш го повтори ставот дека неговата партија нема да отстапи од позициите.
„Кога и да дојде договорот во парламентот, ако поминат сите процедури од страна на Скопје, Независни Грци ќе ја напуштат владата. Ние тоа јасно го имаме кажано, не можам да се согласам за кое било решение што ќе го дава името Македонија без да му се даде збор на грчкиот народ, рече Каменос.
Лидерот на Независни Грци во интервјуто го објасни и процесот што ќе го следи, доколку договорот меѓу Македонија и Грција дојде на дневен ред во парламентот.
„Од моментот кога премиерот ќе реши овој договор да го донесе во парламентот, ќе одам кај него, ќе му соопштам дека ја повлекуваме довербата за владата и си даваме оставки ние што сме министри од Независни Грци и ќе одам кај претседателот на државата, а паралелно ќе ја повлечам довербата на коалиционата влада на двете партии, објасни лидерот на Независни Грци, додавајќи дека во тој случај, во Грција ќе треба да се одржат избори.
Панос Каменос, освен избори, рече дека постои и друго решение, а тоа е одржување референдум, за грчките граѓани да одлучат дали го одобруваат или не договорот.
„Не разбирам зошто да не се одржи референдум во Грција, а да се одржи референдум во Скопје, коментираше Каменос, говорејќи за „Реал фм“.
