Царинската управа на Република Северна Македонија е домаќин на 14-та конференцијата на Светската царинска организација – ПИКАРД (Партнерство во царинското истражување и развој)
На конференцијата, што од утре до среда ќе се одржи во Скопје, учество најави и Генералниот секретар на СЦО, Кунио Микурија.
„Изборот Република Северна Македонија да биде земја домаќин на оваа престижна конференција претставува признание за напредокот во царинското работење во државава и интезивната соработка со СЦО и нејзините држави членки и потврда за реформскиот напредок и посветеноста на Владата, Министерството за финансии и Царинската управа за вклучување во глобалните синџири на светската економија, модернизација на царинското работење и олеснување на трговијата“, соопштија од Царинската управа.
На 14. конференција ПИКАРД се очекуваат околу 200 гости од повеќе од 50 земји, царински експерти и академици кои ќе ги презентираат своите истражувачки трудови на годинашната тема – „Паметни граници за непречена трговија, патување и транспорт“.
Светската царинска организација, основана во 1952 година како Совет за царинска соработка, е независно меѓувладино тело чија мисија е зајакнување на ефикасноста и ефективноста на царинските управи. Во неа денес членуваат 183 царински управи од целиот свет кои заедно покриваат околу 98 проценти од вкупната трговска размена. Како светски центар на царинска експертиза, СЦО е единствената меѓународна организација компетентна за царински прашања.
