Глобалната потрага по контроверзниот основач и извршен директор на „Тераформ Лабс.“ (Terraform Labs), До Квон, продолжува, а јужнокорејските власти сега веруваат дека тој е во Србија, откако го напуштил Сингапур во септември.
Според пишувањето на медиумите, јужнокорејските власти следеле дојава за тоа каде се наоѓа До Квон, сугерирајќи дека тој сега е на Балканот, во Србија, и тие тоа можеле и да го потврдат.
„Неодамна добивме разузнавачки информации дека извршниот директор Квон е во Србија. Направивме проверка на податоците и се покажа дека тоа е вистина“, истакнал владин функционер за весникот „Чосун Медиа“.
Во текстот, исто така, се наведува дека Министерството за финансии на Јужна Кореја е „во процес на барање соработка со српската влада“ во склоп на истрагата.
Јужнокорејските власти трагаат по До Квон уште од падот на „Тера“, но се чини дека засега немале многу среќа во одредувањето на неговата локација.
Се претпоставува дека 31-годишникот се преселил во Сингапур кон крајот на април, непосредно пред шокантниот колапс на системот „Тера“.
На 14 септември, Единицата за финансии и хартии од вредност на Канцеларијата на обвинителот на јужниот округ во Сеул, издаде налог за апсење на Квон, поради наводно кршење на законите за пазарот на капитал на Јужна Кореја.
Отприлика во тоа време, властите во Сингапур потврдија дека Квон повеќе не е во земјата и дека се верува дека отишол во Дубаи, а од таму летал до нова непозната дестинација.
Набргу после тоа, на 26 септември, Интерпол исто така, наводно, издал и „црвена потерница“ против Квон.
Од 11 декември, меѓутоа, се чини дека Квон не е додаден во базата на податоци на Интерпол за „Црвено известување“, на веб-страницата.
Министерството за надворешни работи на Јужна Кореја, информираше дека на 6 октомври од таму издале наредба Квон да го предаде пасошот и додаваат дека во дописот што бил испратен до одметнатиот било наведено дека непочитувањето на условите ќе резултира со целосно откажување на неговиот пасош.
Подоцна истиот месец, обвинителите во Јужна Кореја ги потврдија извештаите дека До Квон полетал за Дубаи и од таму со друг авион заминал на друга дестинација – која, како што се верува, е Србија.
Доколку се покаже дека До Квон е во Србија, останува да се види какви, доколку ги има, правни конци можат да повлечат од Јужна Кореја за да се обиде да издејствува екстрадиција на основачот на „Тераформ Лабс,“.
Јужна Кореја има склучено билатерален договор за екстрадиција со 31 земја, но Србија не е меѓу нив. Но, она на што полага многу надеж е широкиот мултилатерален договор за екстрадиција што тие го имаат склучено со Советот на Европа, чиј потписник е и Србија.
Квон тврдеше дека не е „во бегство“ и дека „не се обидува да се скрие“.
Тој продолжи да биде активен на социјалните мрежи во последните неколку месеци.
Колапсот на системот „Тера“ во мај делумно беше предизвикан од падот на алгоритамска валута „Тера УСБ Класик“ (Terra USD Classic), – USTC, поранешен UST, што го собори нејзиниот сестрински имот „Луна Класик“ (Luna Classic), – LUNC, поранешен LUNA, за речиси 100%.
„Коинтелеграф“ ги контактираше претставниците на „Тераформ Лабс.“, но досега нема добиено каков било одговор за овој случај.
