Фени Индустри има квалитетен инвеститор кој со поевтина струја и доволно капацитет ќе ги рестартира процесите и ќе ги сервисира долговите. Со повлекување на блокадите од банките, и сопирање на предстечајната постапка, инвеститорот ќе може да почне со рестартирање и сервисирање на своите обврски, порачуваат од Кунико Груп, сегашниот сопственик на Фени.
Во моментов, велат од Кунико Груп, инвеститорот не може да ги уплати средствата за плати и оперативно работење на сметка на Фени Индустри затоа што сите би биле повлечени од банките.
„Фени Индустри има сопственици, а тоа не се банките, кои обезбедија инвеститор што е спремен да ги инвестира бараните средства, но не во банките туку во производниот процес, вработените, и останатите доверители, да обезбеди поевтина електрична енергија, и да ги сервисира сите долгови кон останатите доверители, пред се компаниите и вработените кои живеат во Кавадарци и околината од разни услуги кон Фени, соопшти Кунико Груп.
Во целост се согласуваме, нагласуваат во соопштението, со констатацијата на банките за потребните 20 милиони евра за рестартирање на Фени Индустри.
„Фени Индустри се уште има сопственик кој диктира кој и на кого што ќе продава, и само тој сопственик може да одлучува што ќе прави со компанијата. Фени Индустри нема никава потреба од стечај, напротив компанијата е доведена во состојба на намалена задолженост констатирана од сите инстируции и финансиски показатели. Дури и сите лоши побарувања се избришани согласно законската регулатива во РМ, се порачува во соопштението.
Се прецизира дека банките не ги испочитувале договрите за репрограмирање на долговите.
„Самото покренување на блокадата на Фени Индустри, во синхронизирана акција на трите банки за помалку од 24 часа (и покрај постигнатите договори) наведува на нешто сосема друго, и поинаква намера на банките кои меѓу другото спаѓаат во групата на обезбедени доверители, заедно со уште една приватна компанија која е единствената обезбедена, и која во моментов го држи под залог повратот на ДДВ од кој може да се исплатат и платите и дел од побарувањата, се посочува во соопштението и се додава дека само во последните две и пол години им имаат исплатено над 40 милиони евра кон банките.
