Напаѓачот на минхенски Баерн, Роберт Левандовски, кого германските новинари одамна ,од милост го нарекоа „Леванголски“, после третина од трката по „Златната копачка“ во оваа сезона убедливо води на листата на најуспешните.
Полјакот има феноменален скор оваа сезона во германскиот шампионат. Тој собра 32 поени со 16 голови во првите 11 кола во Бундес лигата. Немаше натпревар на кој тој барем еднаш не го матираше противничкиот голман.
Неговата вкупна статистика е, исто така, одлична. До сега тој во германската прва лига одигра вкупно 301 натпревар и на нив даде 218 голови. За 6,5 години колку што настапува во неа пропуштил само 16 натпревари поради повреда.
После неприкосновеното неколкугодишно владеење на Кристијано Роналдо и Лео Меси, сега на Полјакот му се отвори патот од тронот да го симне Меси којшто заради повреда на почетокот на сезоната многу заостанува. Аргентинецот моментно е на 32 место со 16 поени (осум голови).
Роналдо, пак, моментно е „во аут“ со само 10 поени (пет погодоци) на десет натпревари во Серија А.
На Левандовски во овој момент најголем конкурент му е Чиро Имобиле од Лацио, со 28 поени (14 голови) од 12 кола. Третото и четвртото место го делат Тимо Вернер (Лајпциг) и Џејми Варди (Лестер) со по 22 поени, односно со по 11 погодоци.
Ерик Сорга, младиот напаѓач на Флора, долго време беше на чело на листата, но и него Левандовски го претекна. Сорга постигна 31 гол и собра исто толку поени затоа што естонската лига има коефициент 1,00. првенството на Естонија е завршено и Ерик нема шански да се врати на врвот.
