Претседателот на Владата на Македонија, Димитар Ковачевски, во рамки на посетата на Вашингтон, присуствуваше на прием кој се одржа во нашата Амбасада во Вашингтон, а на кој беа присутни високи гости претставници на американската администрација и Конгрес, меѓу кои конгресменката Вероника Ескобар, американскиот специјален претставник за Западен Балкан и заменик државен секретар на САД, Габриел Ескобар, поранешниот амбасадор на САД во Македонија, Филип Рикер, и сегашната амбасадорката на САД во Скопје, Ангела Агелер, и повеќе претставници од Стејт департмент, Пентагон, Националниот совет за безбедност и други институции.
На приемот, Ковачевски во разговор со Ескобар, оцени дека Македонија и САД во континуитет негуваат продуктивен политички дијалог и имаат силно стратешко партнерство.
Премиерот притоа изрази уверување дека со помош на САД ќе се изнајдат решенија на сите отворени прашања во регионот по пат на дијалог, што би довело до побрза интеграција на земјите од Западен Балкан во Европската унија.
Ковачевски нагласи дека Македонија и во иднина ќе биде фактор на стабилност во регионот, практикувајќи ги и во иднина политиките на дијалог и негување на добрососедските односи.
Присутните соговорници уште еднаш потврдија дека иднината на Западен Балкан е во ЕУ и земјите посветено треба да работат на реформските процеси, негување на добросоедските односи, заштита на човековите права и слободи.
Во разговор со конгресменката Ескобар, претседателот на Владата изрази благодарност до САД за поддршката и охрабрувањето на нашата земја во сите важни процеси за нејзин напредок и просперитет, како на внатрешно- политички, безбедносен, така и на меѓународен план.
