Во петок на пладне на плоштадот Македонија ќе се одржи 11. „Матурска парада“ на која традиционално учениците го завршуваат средното образование. Годинава ќе танцуваат и матурантите од Охрид, Струга, Струмица и Гевгелија.
Организаторот на манифестацијата, Дирекцијата за клутура и уметност-Скопје, очекува да се вклучат 1.000 матуранти од 16 средни училишта од Скопје и нивните врсници од Струга , Охрид, Струмица и Гевгелија , или околу 2. 000 ученици. Момчињата ќе носат сини, а девојките жолти маички.
Покровители на „ Матурската парада“ се Град Скопје и Делегацијата на Европската унија во Скопје.
Никола Глигоров од Дирекцијата за култура и уметност на денешната прес-конференција информира дека македонските матуранти ќе танцуваат на иста музика и во исто време заедно со своите врсници од десетина држави од Централна и југоисточна Европа.
Официјалниот дел на програмата ќе почне во 11:40 часот со обраќање на прретставник од Град Скопје, а потоа матурантите ќе ја кажат заклетвата за ненасилство.
Раководителот на секторот за образование во Град Скопје Даниела Захариева Адамова рече дека „Матурската парада“ е празник на Град Скопје и дека секоја година одново поттикнува енергија, младост и радост.
Парадата на матурантите почна да се организира во 2001 година во Љубљана, а во Македонија прв пат се одржа во 2007 година во Скопје и во Охрид во организација на Дирекцијата за култура и уметност на Скопје и Танцовиот спортски клуб „Ритам плус“ од Скопје.
