Деновиве во Министерството за внатрешни работи пристигнале пријави од граѓани за добиенa електронска порака од директорот на Бирото за јавна безбедност, Сашо Тасевски.
Во пораката, информираат од полицијата, било нагласено дека примачот е предмет на правни постапки за сторени низа кривични дела. Притоа, примачот се повикува да го контактира испраќачот заради објаснување за наводните дела, оти така барал Европол.
Министерството за внатрешни работи ги известува граѓаните дека во случајов станува збор за лажна порака која не е испратена од министерството, ниту пак од Судот или обвинителството.
„Овие мејлови се класичен обид за измама. Целта на измамниците е да дојдат до личните податоци на испраќачот заради нивна понатамошна злоупотреба. Затоа апелираме на посебно внимание. Овие пораки не треба да се отвораат. Уште помалку, пак, да се контактира испраќачот преку доставениот линк и да му бидат испратени лични податоци кои тој ги бара“, истакнуваат од МВР.
Патем, од МВР предупредуваат и да не се отвараат линкови и датотеки кои се испратени во прилог на маил порака која доаѓа од непознат испраќач, заради, како што наведуваат од таму, заштита на компјутерски систем на граѓанинот од малициозен софтвер.
Ваквите обиди за измама се со меѓународен предзнак, имајќи предвид дека електронски пораки со слична содржина во изминатиот период беа испраќани и на граѓани во земјите од регионот.
Исто така, деновиве во Секторот за компјутерски криминал е пријавено дека е изработена лажна веб страна на Управата за јавни приходи, од каде се испраќаат пораки за некакво задолжително пријавување на лажен линк. И во овој случај станува збор заизмама.