Министерот за финансии, д-р Фатмир Бесими, вчера беше избран за полноправен член на глобалната Коалиција на министри за финансии за климатска акција.
Коалицијата претставува глобална иницијатива, во која членуваат министри за финансии на 90 држави и претставници на 26 институционални партнери.
Основана во април 2019 година, Коалицијата има за цел да ги координираа активностите на министрите за финансии во насока на почитување на преземените обврски од Парискиот климатски договор и Хелсиншките принципи за климатска акција.
Мисијата на Коалицијата е во целост компатибилна со Планот за забрзан раст 2022-2026 година, во кој една од приоритетните области е заштитата на животната средина, заедно со климатската акција.
Климатските промени се реалност, а поплавите, сушите, пожарите и другите природни непогоди бараат функционални системи за превенција и справување, коишто треба континуирано да бидат вградувани во буџетскиот процес.
Исто така, Коалицијата има за цел да ја поттикне зелената транзиција, меѓу другото, и преку поголемо користење на обновливите извори на енергија и поголема заштита на погодените категории на граѓани и фирми.
Воедно, Коалицијата е задолжена за координиран одговор на министрите за финансии, преку поголеми јавни инвестиции и мобилизирање на значаен приватен капитал за зголемување на адаптибилноста и отпорноста кон климатските промени.
Државите-членки на Коалицијата учествуваат со 40% во глобалната емисија на стакленички гасови и со 66% во светскиот бруто домашен производ.
