Министрите за земјоделство од Централна и Источна Европа и од НР Кина на денешниот 12-ти „Форум за агро-трговија и економска соработка“ во Брдо кај Крањ, Словенија, усвоија заедничка декларација за „Улогата на меѓународната соработка и синџирот за снабдување со храна на локално и глобално ниво“, соопшти македонското министерство за земјоделство, шумарство и водостопанство.
На денешниот состанок министрите за земјоделство од Централна и Источна Европа и од НР Кина кои се дел од платформата за соработка во областа на земјоделството „16+1“, дискутирале за напредокот на соработката во областа на земјоделството во текот на изминатата година. Министрите позитивно ги оцениле реализираните активности врз основа на упатствата од Рига за соработка помеѓу земјите од Централна и Источна Европа и НР Кина и среднорочната Агенда за соработка.
Во своето обраќање на Форумот, македонскиот министер за земјоделство, шумарство и водостопанство, Љупчо Николовски, истакнал дека меѓународната трговија и синџирот за снабдување со храна, како на глобално, така и на локално ниво, се значаен фактор за ублажување на сиромаштијата и постигнувањето на безбедноста на храна како една од целите за одржлив развој на Обединетите Нации, што исто така е дел од заедничата декларација од овој состанок на министрите.
„Посветувајќи голема важност на механизмот за соработка „16+1“, Министерството за земјоделство, шумарство и водостопанство на Република Македонија има одиграно многу активна улога, сметајќи од основањето на Здружение за унапредување на соработката во земјоделството меѓу земјите од Централна и Источна Европа и НР Кина. Ве уверувам дека како Влада, ќе продолжиме да даваме контруктивен и вреден придонес за понатамошен развој на заеднички проекти и активности кои ќе ја унапредат трговијата со земјоделски производи и храна, истражувањето и развојот, размената на добри пракити за одржливо земјоделско производство и преработка на храна“, истакнал Николовски.
Тој посочил дека земјоделството игра важна улога во македонската економија, бидејќи тоа е третиот најголем сектор веднаш по услугите и индустријата.
„Владата на Република Македонија постави амбициозна агенда и ќе направи сериозни интервенции, за да се постигне квалитет на производите, стандардите на безбедност на храната и одржливото искористување на природните ресурси“, рекол Николовски, информираат од министерството.
Заменик-претседателот на Владата на Словенија и министер за земјоделство, Дејан Жидан, изразил голема благодарност до колегите од Централна и Источна Европа и од НР Кина, за нивната посветеност на процесот на унапредување на соработката во областа на земјоделството во рамки на платформата „16+1“.
Домаќин на 13-тиот „Форум за агро-трговија и економска соработка“ ќе биде Литванија.
Форумот годинава е во рамки на 55-тот издание на Саемот за храна и земјоделство „AGRA FAIR 2017“ што се одржува во Горња Радгона.
