Лидерот на опозициската ВМРО-ДПМНЕ, Христијан Мицкоски, изјави дека го поддржува протестот што утре е планиран во Охрид, а е против отворањето на бугарскиот културен клуб именуван „Цар Борис Трети“.
Повика масовно да се излезе на протест, но тој да биде мирен, демократски и без инциденти за, како што рече, „да не им се даде алиби на тие коишто се причината денес Македонија да биде во оваа ситуација“.
„Протестот е демократско право и треба да се протестира, но повикувам тој да биде мирен за да не дозволиме повторно да печалат на ваквите настани оние кои ја втурнаа Македонија во оваа ситуација, тоа е коалицијата СДСМ и ДУИ. Ги повикувам граѓаните масовно да излезат и да го поддржат протестот, но апелирам тој протест да биде мирен и демократски и да не дозволиме каков било инцидент да ја дефокусира јавноста од реалните проблеми, а тоа се инфлацијата, криминалот, корупцијата, енергетската, финансиската криза и уште многу други проблеми со кои Македонија денес се соочува“, рече Мицкоски по поставувањето камен-темелник за изградба на градинка во општина Бутел.
