Новата Година нема да почне со поскапа струја, а први декември ќе донесе намалување на цените на основните прехранбени производи. Министерот за економија, Крешник Бектеши, во разговор за „Дојче веле“ тврди дека Владата има решение за смирување на кризата.
Тој најавува засилување на инспекциските контроли за да нема злоупотреби и тврди дека увозот на струја периодов била поевтина опција од домашното производство.
Патем, уверува дека не се запоставуваат плановите за инвестиции во енергетскиот сектор, но за ефектите сепак ќе треба да се почека.
Бектеши вели дека нема да има драстично зголемување на цената од 1 јануари, дури и дека ќе има поместувања во надолна линија.
Сѐ зависело од тоа што ќе утврдела Регулаторната комисија откако ќе се направат соодветни анализи и проекции.
Како што во моментот стојат работите сигурен е дека кризата нема да биде на товар на граѓаните, на домаќинствата и на малите потрошувачи.
Што и да се случи со производството на ЕСМ, што и да се случи во енергетскиот систем, тврди, оти граѓаните никогаш нема да плаќаат повеќе од она што моментално плаќаат.
Вели и дека од 1 декември треба да ги видиме првичните резултати на пазарот на коригирани цени на основните прехранбени производи, а во следните четири месеци, додека трае кризната состојба, очекува, врз основа на постојани пресметки на трошоците од увозните цени на храната и субвенционираните цени на електричната енергија, како и берзанските цени кои веќе се во мирување, да продолжи намалувањето на цените на реална основа во интерес на потрошувачите.
Некои производители на млеко и леб, посочува, веќе ги коригирале цените, што било за пофалба, но, истакнува, дека не треба тука да застанат.