На последната трка од овогодинешниот светски шампионат во мотоциклизам, во најсилната класа, Мото ГП, триумфираше Шпанецот Марк Маркез возач на „Хонда“, пред Французинот Фабио Квартарара на „Јамаха“ и Австралијанецот Џек Милер на „Дукати“.
Легендарниот италијански ас Валентино Роси на „Јамаха“ повторно разочара и беше дури осми. Седум возачи денеска излетаа од патеката, но за среќа без тешки последици.
Шпанскиот ас, Маркез, кој уште пред време ја освои осмата титула првак на светот, со победата на патеката „Рикардо Тормо, каде што се возеше за Големата награда на Валенсија, 12-та во оваа сезона, донесе одлучувачки бодови за „Репсол Хонда“ која го освои екипниот шампионат пред „Дукати“.
„Направивме голема работа оваа сезона и им се заблагодарувам на сите во екипата“, рече Маркез кому ова му е 82 победа во кариерата.
Во Валенсија од натпреварувањата во светскиот шампионат се прости Шпанецот Хорхе Лоренцо, возач на „Хонда“.
Лоренцо, кој пет пати беше првак на светот, нема да се натпреварува повеќе поради бројните повреди со кои се здоби годинава.
Шампионатот на светот во 2020 година кој ќе има 20 трки, една повеќе од овогодинешниот, затоа што ќе се вози и за Големата награда на Финска, ќе почне на 8 март во Катар.
Во генералниот пласман Маркез освои 420 бодови. На второто место е возачот на „Дукати“, Италијанецот Андре Дивисиоза со 269.