Министерството за труд и социјална политика испрати соопштение како одговор на денешниот допис на СОНК.
„Министерството за труд и социјална политика презеде мерки за надминување на наследените проблеми во Јавните установи за деца – детски градинки, со што се обезбедени услови за непречено функционирање и за непречена грижа за децата корисници.
Информираме дека Министерството веќе прави детална анализа на секоја установа поединечно што во текот на 2018 година ќе резултира со трајно решавање на кадровските проблеми кои во градинските ги создаде претходната Влада, држејќи ги воспитувачите, родителите и децата во редовна неизвесност.
Потсетуваме дека во последните 11 години системски е уривана детската заштита и е направен недостиг на кадар во градинките од повеќе од 2.000 луѓе. Како што веќе известивме, со Буџетот за 2018 година обезбедивме средства за 200 нови вработувања во градинките, за зголемувањето на платите за вработените во градинките за 5 отсто, дополнителни средства за материјални трошоци за функционирање на градинките“ се вели во соопштението на министерството за труд и социјална политика.
