Првиот човек на финансиската полицијата Арафат Муареми, во интерју за Радио Слободна Европа, ги потврди сомневањата дека поранешни функционери и бизнисмени переле пари преку наводни мрежи на офшор компании, одлевајќи огромни средства во странство. Оптимист е дека постапките ќе се докажат и виновниците ќе одговараат за направените злоупотреби.
„Управата за финансиска полиција го дава својот ангажман во борбата против финансискиот и организиран криминал, за гонење на кривични дела кои произлегуваат од злоупотребите на функционерите. Последниот настан кој се случи во Управата е предметот за изградбата на мостот „Око“. Такви настани во брзо време ќе има и други и ќе бидат поинтересни од тоа што тогаш беше кажано на прес конференција“, вели Муареми.
Поинтересни ќе биле, појасни тој, затоа што износите коишто биле злоупотребени, биле многу поголеми од тие кои беа споменати за мостот Око.
„Од денот кога ја добив позицијата, имам нулта толеранција за организираниот криминал и корупција. Работиме да го расчистиме секој вид криминал, без разлика дали е направен од поранешни или сегашни функционери. Имаме случаи кои ги водиме, а каде што се инволвирани сегашни функционери. Нема никаков притисок во Управата. Впрочем има, ама за да се расчисти криминалот“, дециден е Муареми.
