Широка насмевка, крици од радост, раце кренати кон небото. Оваа прослава на Килијан Мбапе, после победата во четвртфиналето над Англија, го обиколи светот и го предизвика гневот на Англичаните, чии медиуми фрлаа со дрва и камења по парискиот магионичар под обвинение дека му се потсмева на противникот и става сол на раната.
Тоа е само една од „милионските“ медиумски стории кои ја следат француската репрезентација во подготовките за големото полуфинале против Мароко.
Фудбалот повторно стана најважното споредно нешто во светот во очите на јавноста. Мундијалска грозница ја тресе нацијата. Во продавниците се бара дрес повеќе. За една недела продажбата порасна за 40 отсто.
Најмногу се бара навивачка сина маичка по цена од 90 евра.
Онаа вистинската, играчкиот дрес, чини 140. Најбарани се оние со броевите и со презимињата на Мбапе и Гризман. Покрај дресови, се купуваат и капи и шалови, се што може да помогне во овие зимски денови, особено во собирањата на навивачите на отворено.
Големо внимание се посветува и на навивачките дилеми.
Имено, во Франција е присутна најголемата колонија на Мароканци надвор од матичната земја.Според официјалните податоци од Институтот за статистика, во Франција има вкупно 7 милиони имигранти, од кои околу 2,5 милиони имаат двојно државјанство.Од таа бројка, Мароканците претставуваат 12 отсто, што е на второ место по бројност, зад Алжир со 12,7.Тоа изнесува околу 840.000 Мароканци, но многумина ја споменуваат и неофицијалната бројка од дури 1,3 милиони во земја со вкупно 67 милиони жители.
Многумина од оние со двојна култура имаат дилема за кого да навиваат.
Сепак, често се извлекува „оправдување“ дека Французите веќе ја освоиле титулата, па дека сега на ред се Мароканците. Се претставуваат како „горди Французи кои не ја забораваат земјата на потекло“ и уверуваат дека ќе бидат задоволни кој и да победи.
