Најстудено утринава е во Берово, Маврово и Битола, каде што во 7 часот се измерени минус 6 степени целзиусови. Минус 6 се измерени и на мерните станици кај Петровец и на Зајчев Рид. Најтопло е во Дојран и Гевгелија со температура од 6 односно 8 степени.
Најмногу снег има на Попова Шапка каде се измерени 37 сантиметри, а снежна покривка од 15 сантиметри има во Маврови Анови и од 11 сантиметри во Крушево.
Утринава времето е ведро и со слаб ветер освен во Штипско и на Ѓуриште каде што дува умерен западен ветер. Појава на магла има во Дебар.
Времето денеска ќе биде сончево, студено и ветровито. Претежно во северните делови ќе има мала до умерена облачност. Вдолж Повардарието ќе дува повремено засилен северен ветер. Максималната температура ќе достигне од 5 до 13 степени.
Во Скопје ќе биде сончево со мала до умерена облачност и со слаб до умерен ветер од северен правец кој во делови од котлината краткотрајно ќе засилува. Максималната температура ќе достигне до 9 степени.