Познатиот англиски клуб Евертон непосредно пред натпреварот против Саутемптон донесе одлука без преседан, му забрани на бордот на директори да присуствува на овој меч.
Претседателот, Бил Кенрајт, извршната директорка, Денис Барет-Баксендејл, главниот финансиски и стратегиски директор, Грант Инглс, и директорот Грем Шарп, доживеаја да не можат да влезат во култното зграда на тимот во која работат – „Гудисон парк“.
Членовите на одборот добија такви инструкции откако клубот забележа зголемување на агресивното однесување на неодамнешните домашни натпревари, и откако челниците добија низа заканувачки пораки.
„По деталната проценка на ризикот, на членовите на управата на клубот им беше кажано дека не треба да присуствуваат на денешниот натпревар. Ова е одлука без преседан за Евертон: никогаш досега на целиот наш одбор на директори не му било наредено да не присуствува на натпревар од безбедносни причини. Ова е многу тажен ден за Евертон и за неговите навивачи“, се наведува во соопштението за медиумите на клубот од Ливерпул.
Извршната директорка, Денис Барет-Баксендејл, наводно, претходно била удрена додека ја напуштала ложата на „Гудисон Парк“ од страна на еден „навивач“. Во друг инцидент, нејзиниот автомобил, наводно, бил опколен и плукан, додека претседателот, Бил Кенрајт, добил смртни закани.
Зошто навивачите на Евертон се незадоволни?
Екипата од Ливерпул предводена од Френк Лампард е во зоната за испаѓање со 15 бодови.
Последен пат во Премиер лигата Евертон победи на 22 октомври минатата година, кога го совлада Кристал Палас со 3:0. Оттогаш загуби четири првенствени натпревари и уште два одигра нерешено.
Исто така, Евертон во ноември испадна од Лига купот, а во јануари беше елиминиран од ФА Купот.
На почетокот на јануари навивачите, незадоволни од ситуацијата, напишаа отворено писмо до сопственикот на клубот, Фархад Мошири, барајќи радикални промени. Во одговорот на писмото, Мошири навел дека има „доверба во своите вработени“.
„Верувам во работата што ја работи не само нашиот тренер, туку и нашиот спортски директор и раководството. Ова верување се заснова на моето познавање на длабочината и на квалитетот на работата што се обавува.“
Зборовите на сопственикот не ги убедија навивачите на Евертон, па после мечот со Саутемптон планираат протести.
Исто така, коалицијата на навивачи на споменатиот клуб започна кампања со слоганот „да се повика Мошири да ја признае неговата загриженост за лошата позиција на клубот“.
Во текот на денешниот натпревар против „светците“, навивачите му ветија целосна поддршка на Лампард и на неговата екипа. Групата навивачи истакна дека „ова веќе не можат да го толерираат, и дека сопственикот на клубот треба да се позанимава со флагрантните недостатоци на водството, на претседателот, на управниот одбор и на извршната управа“.