Извршниот директор на „ЕнВидиа“, Џенсен Хуанг, вели дека „секој може да биде програмер“, бидејќи генеративната вештачка интелигенција ќе разбира повеќе форми на внесување, вклучувајќи и говорот.
И,не само што ќе може да креира нови апликации, туку ќе биде во состојба и да ги подобри постоечките.
Во пресрет на ѕвездениот извештај „ЕнВидиа“ за заработка и последователниот раст на акциите, Хуанг предвидува дека светот влегува во „нова компјутерска ера“.
Тој вели дека секој може да биде програмер, само со разговор со компјутерот, и саканите функции ќе се појават, ќе излезат на виделина.
Програмерите повеќе нема да мора да пишуваат ретки кодови, само за да им се прикаже страшното „неуспешно компајлирање“ поради тоа што недостасува точка или запирка.
„Како ќе се направи тоа? Со генеративната вештачка интелигенција“, рече Хуанг за време на неговото воведно обраќање, вчера, на форумот „Компјутекс“ (Computex Forum) во Тајван.
Во својот прв јавен говор после пандемијата, Хуанг ја претстави новата платформа за суперкомпјутерска вештачка интелигенција наречена ДГХ ГХ200 (DGX GH200), чија цел е изградба на генеративни модели со вештачка интелигенција.
Генеративната вештачка интелигенција е тип на технологија за вештачка интелигенција која може да произведе различни типови на содржина, вклучувајќи текст, слики, аудио и синтетички податоци.
„На овој компјутер не му е грижа како ќе го програмирате, тој ќе се обиде да разбере што мислите, бидејќи има неверојатно голема можност за јазичен модел.И така програмската бариера е неверојатно ниска“, истакна Хуанг.
„Го затворивме дигиталниот јаз.
Секој е програмер. Сега само треба да му кажете нешто на компјутерот“.
Од „ЕнВидиа“ посочуваат дека генеративната вештачка интелигенција е „најважната компјутерска платформа на нашата генерација“, бидејќи поединци и компании се движат кон создавање нови апликации и искористување на генеративната вештачка интелигенција во тој процес.
„Креативните професионалци ќе можат да креираат слики со едноставно текстуално упатство, додека програмерите ќе можат да го забрзаат развојот на апликациите и да ги отстранат грешките“, велат од компанијата.
Дури и архитектите можат да генерираат 3Д модели од 2Д планови.
„Секоја компјутерска ера ви овозможи да правите различни работи кои претходно не беа можни“, рече Хуанг, додавајќи дека „вештачката интелигенција секако ги исполнува условите“.
Објасни дека оваа компјутерска ера е „специјална на неколку начини“.
Хуанг потенцираше дека генеративната вештачка интелигенција може да разбере и други информации, освен текстови и бројки.
„Сега може да ја разбере мултимодалноста, што е причина зошто оваа компјутерска револуција може да влијае на секоја индустрија“, додаде тој.
За разлика од традиционалните модели на развој на компјутерски апликации, кои бараат нови апликации и нов хардвер за прилагодување на напредокот како што е вештачката интелигенција, Хуанг рече дека генеративната вештачка интелигенцијане само што ќе може да влијае на новите апликации, туку и ќе ги подобри старите.
„Секоја апликација што постои ќе биде подобра поради вештачката интелигенција… Може да успее со старите апликации. Но, ќе има и нови примени. Стапката на напредок, бидејќи е толку лесна за користење, е причината зошто расте толку брзо“.
