ПЕРН, полскиот оператор на гасоводот, утринава објави дека „системите за автоматизација вчера доцна вечерта откриле истекување во цевководот ‘Дружба’, на една од двете линии на западниот дел на нафтоводот“ во близина на градот Ланиа, на околу 80 километри северозападно од Варшава.
Тоа е линијата преку која сурова нафта стигнува до Германија. Останатите елементи на инфраструктурата со кои управува ПЕРН, работат без никакви пречки.
Причините за истекувањето не се познати, се вели во соопштението за печатот објавено од ПЕРН на нивната веб-страница, потпишано од Катарзина Красињска.
Локацијата на инцидентот е обезбедена и се спроведуваат мерките предвидени за таков случај.
Нафтоводот „Дружба“ е еден од најголемите во светот, кој го снабдува со руска нафта поголемиот дел од централна Европа, вклучувајќи ги Германија, Полска, Белорусија, Унгарија, Словачка, Чешка и Австрија.
Од 5 декември оваа година, Европската унија ќе престане да купува нафта која доаѓа преку „Дружба“, со исклучок на Унгарија, Словачка и Чешка, бидејќи тие немаат пристап до морето. До крајот на следната година тие земји треба да најдат алтернативно снабдување.
Засега нема реакција од рафинеријата за нафта во источниот германски град Швед, која е зависна од нафтоводот „Дружба“. Германската влада има намера таа нафта да ја замени со казахстанска нафта, која исто така ќе доаѓа преку „Дружба“.
„Овде можеме да зборуваме за случајна штета“, изјави за Ројтерс највисокиот полски функционер задолжен за енергетската инфраструктура, Матеуш Бергер, додавајќи дека нема причина да се верува дека истекувањето било предизвикано од саботажа. Така е отфрлена можноста инцидентов да се поврзе со неодамнешните потврдени саботажи на гасоводите „Северен тек 1“ и „Северен тек 2“ што минуваат по дното на Балтичкото Море.
Сторителот сè уште не е официјално именуван за овој чин, иако повеќето земји веруваат дека виновникот е Русија, бидејќи тоа создава предуслови добавувачот на гас, „Гаспром“, да го намали снабдувањето на Европа (читај Германија) повикувајќи се на технолошки тешкотии, поради што не може да биде обвинет за прекршување на одредбите од договорот за снабдување со гас. Официјална Москва, поради неволјите што ги трпи нејзината агресија врз Украина, настојува да го намали дотокот на енергенси во Европа, така што Унијата, поради високите цени и недоволното снабдување, ќе ја намали помошта за Киев и ќе се врати на енергетските зделки со Москва.
Кремљ веднаш ги обвини САД за саботажа, тврдејќи дека сакаат што е можно помал проток на руски гас во Европа за, како што велат, да можат да продава што е можно повеќе од своите резерви по екстра високи цени.
Русија користи низа притисоци за да предизвика раздор во членките на Европската унија, што досега не успеа бидејќи Унгарија се согласи на осмиот пакет санкции – тоа треба да се види во светло на притисокот од Брисел дека мора да ја уреди внатрешниот систем за контрола на корупцијата за да добие средства од Фондот за закрепнување (вкупно 12 милијарди евра).
