Лицето кое вечерва со нож нападна двајца војници во Брисел им подлегна на повредите откако беше пукано во него, соопшти белгиското Федерално обвинителство.
„Веруваме дека станува збор за терористички напад“, изјави портпаролката на обвинителството.
Инцидентот се случи околу 20.15 часот во центарот на Брисел, а напаѓачот, според наводите на бриселската РТБФ телевизија, при нападот на војниците извикувал „Алаху Акбар“.
Локалните медиуми јавуваат дека во прашање е Сомалиец на околу триесетгодишна возраст кој од порано не и бил познат на полицијата.
Обвинителство претходно соопшти дека 30-годишен маж, за кого наведе дека на белгиските власти не им бил познат како лице поврзано со тероризам, е застрелан вечерва откако двајца војници нападна со нож.
Во соопштението се прецизира дека војниците откако биле нападнати пукале во напаѓачот, кој потоа во критична состојба е префрлен во болница. Допнително во известувањето до јавноста се наведува и тоа дека војниците се ранети, еден во лицем а друг во рака, но дека не станува збор за сериозни повреди.
Центарот на Брисел околу булеварот Емил Жакман, каде што се случи нападот, е затворен за сообраќај. На местото на инцидентот се наоѓаат полициски екипи и претставници на федералното обвинителство и градоначалникот на Брисел. Случајот во овој момент се третира како терористички акт од поединец.
Кризниот центар на Твитер соопшти дека „ситуацијата е под контрола“, додека белгискиот премиер Шарл Мишел на истата социјална мрежа порча дека безбедносните служби остануваат во приправност и дека со внимание го следат развојот на случувањата.
Белгија е под силни мерки на безбедност откако во двоен бомбашки напад на 22 март лани беа убиени 32 лица на бриселскиот аеродром и во метрото.
