Поранешната скопска обвинтелка Гордана Ѓешкоска и нејзиниот колега Златко Биковски, од Обвинителството за гонење на организиран криминал и корупција, велат дека за исттрагата против нив слушнале од медиумите
Јавното обвинителство на Македонија и Советот на јавни обвинители, односно Етичкиот комитет, не се произнесуваат официјално по информацијата дека за тројца обвинители е поведена дисциплинска постапка, поради сомнеж дека на 27. април минатата година не бил извршен увид во Собранието и дека биле направени низа пропусти во работењето на тој случај.
Во очекување на официјална потврда за тоа дали ќе се бара одговорност за евентуални пропусти поврзани со настаните од „крвавиот четврток“, засега сѐ се сведува на една изјава на државниот јавен обвинител Љубомир Јовски, со која тој најави истраги за сѐ што е сомнително, а се однесува на работењето на некои обвинители или обвинителства.
Според пишувањето на некои медиуми, „на тепет“ се нашле поранешната скопска обвинителка Гордана Ѓешкоска, нејзиниот заменик Јован Цветановски и екс-шефот на Основното јавно обвинутелство за гонење на организиран криминал и корупција, Златко Биковски.
Спорад непотврдени сознанија на „ПРАВОСУДСТВО.МК“, како осомничена, наводно, се водела уште една обвинителка што нејзините колеги ја доживуваат како „сива еминениција“ и за која се зборува дека за кратко време изградила пристојна кариера.
Во текот на денов разговаравме со обвинителката Ѓешкоска и со обвинителот Биковски и она што може да се подведе како заеднички заклучок е дека тие за дисциплинската постапка разбрале од медиумите.
„Немам ништо добиено и не можам да коментирам нешто за што слушнав од медиумите“, вели обвинителката Гордана Ѓешкоска и упатува на законската процедура која се однјесува на вакви случаи.
„Јас знам дали и што е превземено, но таков одговор можам да дадам онаму каде што тие вообичаено се даваат во вакви ситуации!“, вели Ѓешкоска и појаснува дека за неа е неразбирливо како може медиумите да знаат за водење дисциплинска постапка, а да не знаат оние чии имиња се споменуваат, притоа имајќи предвид дека законот наложува во рок од пет дена да се даде одговор по изнесените сомнежи.
Со безмалку ист коментар е и јавниот обвинител Златко Биковски. Тој потврдува дека нему не му е ништо доставено и дека нема намера да коментира нешто за што слушнал од медиумите.
Познавачите на состојбите велат дека не треба да се исклучи можноста од поведување постапка за некои обвинители, бидејќи со тоа што не е спроведен увид во Собранието е направен своевиден преседан во работата на Јавното обвинителство. Од друга страна постојат сериозни сомневања дека за овој случај ќе се огласи и Етичкиот комитет на Обвинителството, бидејќи претседателот Тодор Витларов не се огласи ни во случајот на Коле Штерјов, но и за случувањата со гласањата и изборите во Советот на јавни обвинители.
Инаку, времето кога се случи упадот во Собранието на РМ е период кога со Јавното обвинителсто на Република Македнија шефуваше Марко Зврлевски.
Љубиша Станковиќ
ПРАВОСУДСТВО.МК
