Нискобуџетната авиокомпанија ВизЕр планира да затвори или привремено да прекине неколку линии од три држави на поранешна Југославија.
Кога станува збор за Босна и Херцеговина, ќе се затворат летовите од Бања Лука до Стокхолм, а последната линија е планирана за 28 август.
Освен тоа, ќе се затворат и летовите од Бања Лука до Хамбург, на крајот на летната сезона, на 28 октомври.
Од друга страна, ВизЕр оваа зима ќе ги одржува линиите од Бања Лука до Базел и Дортмунд.
Операторот на аеродромот во Република Српска соопшти дека авиопревозниците го задржуваат правото да ја сменат својата мрежа на дестинации и дека аеродромот во Бања Лука има договор со ВизЕр до летната сезона во 2024 година.
Нискобуџетниот превозник планира исто така оваа зима да прекине две линии од Подгорица.
На крајот на октомври ќе бидат запрени летовите од главниот град на Црна Гора до Рим Фиумичино и до Виена.
Меѓутоа, од ВизЕр велат дека двете линии ќе бидат обновени за време на летната сезона во 2024 година, која почнува на 31 март следната година.
Минатата зима ВизЕр имаше летови до италијанскиот и австрискиот главен град.
Како што пренесува „Екс-ју авијација њуз“, ВизЕр одлучи привремено да ги запре летовите од Виена и Рим за Подгорица и обратно.
Се наведува дека во соопштението на ВизЕр е нагласено дека овие линии ќе продолжат и во текот на летната сезона.
ВизЕр ќе ги прекине и летовите меѓу Ниш и Малме во текот на зимските месеци, а последниот лет во годината треба да биде на 27 октомври.
Рутата беше задржана во текот на претходната зимска сезона, меѓутоа, превозникот ги суспендираше летовите меѓу двата града и во минатото, како што беше случајот во 2019 година. Малме беше првата дестинација на ВизЕр од Ниш.
„ВизЕр нема да лета за Малме во претстојната зимска сезона поради оперативни причини, но се очекува да продолжи да ја одржува услугата сезонски“, соопштија од Аеродроми Србија.
Како што беше претходно најавено, ВизЕр ќе ги зголеми летовите од Скопје и Белград во претстојната зимска сезона.
