Несериозно е прашањето за договорите со Бугарија кое е важно за граѓаните да се условува со дневно политичко прашање како предвремени избори, оценува министерот за надворешни работи Бујар Османи.
-Мислам дека би било несериозно едно вакво прашање важно за граѓаните да се условува со некакво дневно политичко прашање и некаков партиски интерес. Мислам дека би изгубиле кој и да проба да врзе еден стратешки интерес со партиски интерес. Граѓаните можат тоа да го идентификуваат и тоа ќе го казнат, тоа сум убеден. Во однос на тоа дали ќе се оди во Собрание, можам да повторам ставот, дека мојот пристап не беше таков, сметам дека треба да го почитуваме тоа што Собранието еднаш го има донесено и ратификувано како договор и ние во рамки на тој договор треба да имплеметираме одредени фази, рече Османи во гостувањето во Утрински брифинг запрашан дали опозицијата во наредниот период може да ги условува договорите со Бугарија со предвремени парламентарни избори.
Тој објасни дека бугарската страна инсистира што и да се договорат двете држави да оди во Собрание.
-Тоа го бараат и наши луѓе од овде, опозиција, разни политички опоненти се приклучуваат кон оваа позиција на Бугарија. Еве пеки, ќе се оди во Собрание, ќе се ратификува ако е тоа барањето, дециден е Османи.
Шефот на дипломатијата Османи, денеска ќе има излагање пред членовите на собраниската Комисија за надворешна политика со која раководи пратеникот Антонио Милошоски од ВМРО-ДПМНЕ, за текот на разговорите и севкупните односи меѓу Република Северна Македонија и Република Бугарија.
извор: МИА
