Министерството за здравство најостро ги демантира и осудува пласирањата на лажните документи што опозицијата и медиуми блиски до неа ги прикажуваат дека, наводно, се составен дел од процесот за набавка на вакцини против Ковид -19.
„ВМРО ДПМНЕ свесно сака политички да профитира по цена да се наруши договорот за набавка на вакцини и по цена на здравјето на граѓаните. На помош на опозициската партија се и некои медиуми кои, единствено од за нив разбирливи причини, објавија таканаречен документ, кој е лажен, и на ниту еден начин не е поврзан со процесот за
набавка на вакцини, како што сакаат да и прикажат на јавноста“, се наведува во соопштението на Министерството за здравство.
Министерството реагира и на сумата наведена во документот, која некој сакал да ја прикаже како цена за купување на вакцини.
„Партијата ВМРО-ДПМНЕ и медиуми блиски до нив сакаат да одржат во живот афера која не постои, сакаат да пласираат во јавноста криминал кој не постои, сакаат да спречат Владата и Министерството за здравство да купат вакцини против Ковид-19. И ВМРО ДПМНЕ и медиумите блиски до нив многу добро знаат дека процесите за набавка на вакцини се доверливи, посебно цените на вакцините. Тоа е глобална политика на сите производители. Но, и покрај тоа свесно се обидуваат преку лажни информации да наведат дека, од една доверлива постапка излегуваат податоци и документи во јавност. Уште еднаш Министерството за здравство демантира дека документот и сумата наведена во истиот се поврзани со набавка на вакцини. Потенцираме дека станува збор за лажен податок.“
Министерството за здравство се осврнува на работењето во „вмровско време“ кога, велат, провизиите кои во денешно време се дел од кривични постапки кои се во тек биле во преден план, а дека сите набавките, без исклучок, оделе преку „фантом фирми“.
„Го цениме истражувачкото и критичко новинарство, тоа е двигател на секое демократско општество, но го осудуваме пласирањето на лажни информации. За функционално демократско општество, подеднаква е одговорноста и на државните институции и на медиумите“, стои на крајот во соопштението.
