На Германија до 2060 година ќе и недостигаат пет милиони работници, покажува студијата на Институтот за истражување на трудот (ИАБ), која во саботата ја објавија германските медиуми. „Студијата покажува дека работодавачите ќе имаат многу помалку работници на располагање во годините што доаѓаат“, рече Енцо Вебер од ИАБ, институт што работи во рамките на Федералната агенција за вработување во Нирнберг.
До 2060 година бројот на работници на пазарот на труд ќе се намали за 11,7 отсто, од сегашните 45,7 на 40,4 милиони. Во исто време, овие проценки го земаат предвид растечкиот процент на постари граѓани и жени кои влегуваат на пазарот на трудот, како и мерките кои треба да ја поттикнат имиграцијата на работната сила. „Ако сакаме да направиме нешто против овој тренд, тогаш мора дополнително да ги забрзаме мерките како што се интеграцијата на старите и жените на пазарот на трудот, како и имиграцијата“, рече Вебер. Тој рече дека во иднина ќе биде неопходно да се потпреме на работници надвор од ЕУ при имигрирање на работната сила, која во моментов првенствено доаѓа од другите земји на Европската унија.
„Мораме да ги отстраниме пречките што стојат на патот на имиграцијата на работна сила од трети земји“, рече Вебер.
Во моментов, новиот закон на коалициската влада, кој треба да ја олесни имиграцијата од земјите кои не се членки на ЕУ, минува низ собраниска процедура.
Но, тоа, според мислењето на економистите од ИАБ, нема да биде доволно.
„Мораме да го зголемиме наталитетот, а за тоа мора да создадеме социјални услови кои ќе ја олеснат хармонијата помеѓу семејниот и работниот живот. Тие вклучуваат фактори како што се флексибилно работно време, како и обезбедување доволен број места во градинките“, заклучи Вебер.
