Многу е позитивно тоа што во заклучоците од Европскиот совет е споменато дека прашањето за европската перспектива на Западен Балкан одново ќе се разгледа во
следните месеци, рече портпаролот на грчката влада, Стелиос Пецас на денешниот редовен брифинг со новинарите, jави дописничката на МИА од Атина.
Пецас истакна дека Грција „навистина е за европска перспектива“ на земјите од регионот, објасни дека грчкиот премиер и дома и во странство, секогаш потенцира дека земјата го поддржува Западен Балкан на патот кон ЕУ, „бидејќи е во интерес и на самите земји и во интерес на Европа и во интерес на Грција“.
„Ние очекуваме да видиме како ќе се развие дискусијата на ниво на Европската унија. Многу е позитивен фактот што во текстот со заклучоците на Европскиот совет постои тоа дека за ова прашање одново ќе се разговара во следните месеци и во секој случај пред пролет. Според тоа, тука сме да го поддржиме она што го кажуваме дека навистина сме за европска перспектива на земјите од Западен Балкан, рече Пецас.
Одговарајќи на новинарско прашање, портпаролот на грчката влада го повтори ставот дека тие сметаат дека во Договорот од Преспа постојат елементи што се понаклонети кон едната страна, а како пример го спомена спроведувањето на ерга омнес.
„Она што сакам да го кажам е дека овој Договор е потпишан, ратификуван. Ние направивме сѐ и да не се потпише и да не се ратификува од грчкиот Парламент.
Велевме и предупредувавме дека постојат елементи што се понаклонети кон едната страна, едно од тие е спроведувањето на ерга омнес и како што се покажа веќе постојат завршени работи, правни и политички како што е влезот на нашата соседна земја во НАТО, објасни портпаролот на грчката влада.
Во однос на комисијата за трговските ознаки, Пецас рече дека заштитата на македонските производи и понатаму е едно од главните прашања за грчката влада кога говори за подобрување на „штетниот договор“.
„Ја градиме нашата позиција во однос на заштитата на македонските производи. Како што знаете тоа е едно од најосновните прашања што ги истакнавме кога велиме дека сакаме да го подобриме овој штетен договор и ќе направиме сѐ за да ги заштитиме имињата „македонско/македонски“ на етикетите или производите на грчките компании. Тоа е нешто што е во тек, рече Пецас и додаде дека во суштина, комисијата за трговски ознаки формирана од претходната влада „не донесе резултати“.
Минатата седмица грчкиот премиер во Солун одржа состанок со претставници на организациите и здруженијата на производители на кој присуствуваа и градоначалникот и надлежниот префект, а една од темите беа трговските ознаки.
Паралелно во грчките медиуми се појавија информации дека станало збор за промена на терминот „Macedonia“ во „Makedonia“ за грчките производи во странство, нешто што предизвика реакции во Грција.
Владиниот портпарол, на денешниот редовен брифинг со новинарите одговарајќи на прашањето на дописничката на МИА од Атина, рече дека целата таа дискусија официјално беше демантирана и не се разговарало за такво нешто.
„Она што треба да очекувате се резултатите од оваа комисија, која што ќе започне да работи. Но, прашањето не е само комисијата и македонските производи, кога гледаме дека имаме таков развој на настаните, другата страна да смета дека треба одново да разгледа различни работи што се поврзани со Договорот од Преспа. Овде сме, ќе ги видиме останатите работи во следните месеци, рече Пецас.
ИЗВОР: МИА
