Милиони Шпанци оваа недела ќе бидат во чекор следени преку нивните мобилни телефони, во рамки на контроверзната владина студија, која е замислена за прибирање на информации за тоа каде патуваат граѓаните, но и за жради „подобрување на јавните услуги“.
Националниот завод за статистика ги уверува луѓето дека осумдневниот проект е потполно анонимен, но тоа не ја запре загиженоста заради прашањето на приватноста.
Трите најголеми шпански оператори на мобилната телефонија, „Мовистар“, „Водафон“ и „Оранж“, учествуваат во проектот и тврдат дека не го кршат законот со тоа што прибраните податоци ќе и ги предадат на владата. Трите компании претставуваат речиси 80 отсто од мобилните корисници во Шпанија.
Шпанскиот завод за статистика прво ќе го следи движењето на луѓето меѓу 18 и 21 ноември, потоа на 24 ноември, на Божик (25 декември), па потоа на 20 јули и 15 август следната 2020 година.
Со достапните информации може, на пример, да се види „колку мобилни телефони има во 17 часот во одредена улица, во кој било град со повеќе од 15.000 луѓе“, информираат од Заводот за статистика.
Не е изненадување тоа што многу Шпанци на социјалните мрежи не ја дочекаа идејава со голема симпатија.
„Не сум ви дал никаква согласност да ме следите и да кажувате каде сум“, напиша едно лице, советувајќи ги Шпанците да бараат телефонски компании кои не учествуваат во студијата.
Друг, пак, на Твитер одговори на објавата на надлежните за студијата со детали на неговиот распоред за денот „за да му го олесни животот на ‘големиот брат’“, додека други велат дека, ако владата сака информации за патувањата на граѓаните за попис на населението, треба тоа да го побара од нив, пред да ги „испокраде“ низ таква студија.
Некои луѓе велат дека во текот на проектот своите телефони ќе ги стават во мирување, во „авионски режим“.
Шпанските медиуми, исто така, објавија информации кои објаснуваат како корисниците на телефони можат да избегнат следење во предвидените термини.
За да се спроведе истражувањето, агенцијата ја подели земјата на 3.200 ќелии, со преку 5.000 луѓе во секоја. „Снимателите“ ќе можат да дознаат колку телефони има во секоја ќелија во одредено време од денот.
Прво ќе се анализираат телефоните помеѓу полноќ и 6 часот наутро, за да се дешифрираат корисниците на мобилните, а потоа повторно меѓу 9.00 и 18.00 часот, за да се открие каде работат или, на пример, каде одат во текот на денот.
Резултатите ќе бидат користени во пописот во 2021 година и ќе се открие кои рути за патувања најчесто се користат, кои локации се најпосетувани за одмор, како и информации за тоа колку луѓе работат или студираат на голема оддалеченост од своите домови.
Владата ќе плати на секој од трите глави оператори по 500.000 евра за пристап до вредните информации, се наведува во извештајот.
