Ширум европскиот континент беснеат стотици пожари. Во последните две недели, поради високите температури починаа неколку илјади луѓе. Бројни земји бележат температурни рекорди.
Повеќе од 30 шумски пожари низ Шпанија принудија на евакуација илјадници луѓе и проголтаа над 220 квадратни километри шуми и ниска вегетација. Пожарникарите во моментов се најмногу загрижени за огновите во покраините Леон и Авиља, откако ветерот и малку пониската температура им дадоа одмор во борбата против пламените јазици во покраината Замора.
„Чувствувам голема празнина. По природа сум оптимист, но кога ќе помислам на планините и шумите, тогаш мислам на тоа што ќе остане“, вели еден од евакуираните.
„Тука сме за сите потреби на евакуираните. Пред се, со нив многу работиме на психолошка поддршка, бидејќи тие го напуштаат својот дом не знаејќи што се случува“, вели работник на Црвениот крст.
Ништо подобра слика не е ниту во соседна Португалија. Министерството за здравство на земјата соопшти дека од топлотен удар од 7 до 18 јули починале 1.065 лица. Активни се 13 пожари, а на северот од земјава температурата во последните денови достигна рекордни 47 степени Целзиусови.
Во Велика Британија изгореа десетици згради и имоти на југот на земјата и во околина на Лондон. Претходно пожарникарите добивале околу 350 повици дневно, а последните денови имало и до 2.600.
Во Грција поради пожарот на островот Саламис се евакуирани неколку подрачја, а добра вест е што пожарникарите успеале да го стават под контрола огнот кој избувна на планината североисточно од Атина.
„Полицијата и надлежните ни рекоа да одиме, но на многумина им е навистина тешко да ги напуштат своите домови. Иако не треба, сепак ќе останеме“, вели жител.
Пожарникари денеска се борат со шумски пожари во јужниот италијански регион Калабрија, а метеоролозите предупредуваат дека температурите ширум земјата повторно ќе се зголемат во наредните денови.
Огнови горат во шумите низ таа најјужна италијанска континентална регија. Минатата недела таму температурите беа над 40 степени. Поради пожарот, повикано е засилување од Кампанија и Лацио, како и од сицилијанскиот град Месина.
Топлотен бран го погоди југот на Европа за време на шпицот на туристичката сезона, соборувајќи ги температурните рекорди.
Синоптичарите предвидуваат дека на југот на Италија, на островите Сицилија и Сардинија, утре ќе пристигнат екстремни горештини до 48 степени, после што температурата ќе се спушти на нормалното летно ниво.
Италија е една од европските земји најпогодени од климатските промени. Во мај беше погодена од разорни поплави.
И северните делови на Италија изминативе денови беа погодени од екстремни временски услови. Во вториот по големина италијански град Милано се појави торнадо, а североистокот го зафати град и силни ветришта.
„Нашата клима станува се повеќе тропска, менува сè и има директно влијание врз економијата“, изјави министерот за економија, Жилберто Пичето, за весникот „Ла Република“.
Повеќе од илјада пожарникари гаснат големи пожари на границата меѓу Италија и Словенија. Пожарот се прошири од италијанска страна кон Словенија и покрај обидите за гаснење од воздух во кои беа вклучени три словенечки и два италијански хеликоптери. Најтешка е состојбата во општина Добердоб, која се наоѓа веднаш до словенечко-италијанската граница. На Словенија и помага и Хрватска која на помош и испрати свој канадер.
„Ситуацијата се менува од минута во минута. Пет села се евакуирани. Пожарникарите добиваат засилување. Словенечката војска е во акција со сета потребна опрема. Во гаснењето на пожарот еден полициски и два воени хеликоптери“, вели Марјан Шарец, министер за одбрана на Словенија.
Пожари има и во Босна и Херцеговина. Најтешко е на планината Чврсница на непристапен терен. Пожарот што избувна во Црна Гора, кај Херцег Нови, се прошири кон исток. Таму недостасуваат противпожарни авиони.
Сите се загрижени од прогнозата на метеоролозите дека топлотниот бран во Европа ќе продолжи и во наредните денови, а топлото и суво време поттикнува се повеќе пожари.
(Фото: ЕПА)
