Германската авиокомпанија „Луфтханза ерлајнс“ соопшти дека ќе оперира само 10 до 20 отсто од своите летови закажани за денеска поради повиците за штрајк на персоналот на земјата како дел од преговорите за платите. „Во моментов, претпоставуваме дека само околу 10 до 20 отсто од летовите ќе можат да оперираат“, објави најголемата европска авиокомпанија на својата веб-страница.
Штрајкот започна утринава во 4 часот и треба да трае до утре наутро во 7 часот и 10 минути, соопшти синдикатот Верди.
Според Луфтханза, 100.000 патници се погодени од предупредувачкиот штрајк што се одржува на аеродромите во Франкфурт на Мајна, Минхен, Хамбург, Берлин, Дизелдорф, Келн-Бон и Штутгарт. Верди повика на нов штрајк како дел од несогласувањата за платите на персоналот на теренот, односно 25.000 вработени.
Претходниот штрајк на почетокот на февруари предизвика откажување на речиси 90 отсто од летовите.
Верди бара зголемување на платите за 12,5 отсто, со најмалку 500 евра повеќе веднаш на месечниот список, како и бонус за инфлација од 3.000 евра. Целта е да се неутрализира инфлацијата во последните години во Германија, која минатата година достигна 5,9 отсто, по 6,9 отсто во 2022 година.
Компанијата, од своја страна, предлага зголемување од четири проценти во декември, како и зголемување од 5,5 проценти почнувајќи од февруари 2025 година. Таа го прифати бонусот за инфлација што го побара синдикатот. Според синдикатот, додека Луфтханза на своите пилоти им дава двоцифрени покачувања, персоналот на земјата не добива ни компензација за инфлацијата.
Германија се соочува со серија штрајкови кои особено го погодуваат транспортниот сектор, но и индустријата и другите услуги. Вработените сметаат дека предложеното зголемување на платите е недоволно со оглед на поскапувањето од 2022 година.
(Фото: ЕПА-ЕФЕ/РОНАЛД ВИТЕК)
