Цената на бензините од ноќеска на полноќ се зголемува за 1,5 до два денара за литар, а дизелот поевтинува за половина денар, одлучи денеска Регулаторната комисија за енергетика и водни услуги.
Со одлуката се врши зголемување на малопродажните цени на нафтените деривати во просек за 0,62 отсто.
Малопродажната цена на бензинот ЕУРОСУПЕР БС-95 се зголемува за 1,5 денари за литар и ќе изнесува 94 денари, додека ЕУРОСУПЕР БС-98 поскапува за два денара за литар и ќе се продава за 96,5 денари.
Цената, пак, на ЕУРОДИЗЕЛ се намалува за половина денари и ќе изнесува 98,5 денари за литар, а Екстра лесното масло за домаќинство на останува „по старо“, 93 денари за литар.
Со одлуката на „Регулаторна“ за 0,072 денари за килограм се намалува цената на мазутот, кој сега ќе чини 49,995 денари.
Референтните цени на нафтените деривати на светскиот пазар во споредба со претходната пресметка бележат зголемување кај бензините во просек за 1,994 отсто, кај дизелот има намалување за 0,558 отсто, кај екстра лесното масло намалување за 0,436 и кај мазутот намалување за околу 0,165 отсто. Курсот на денарот во однос на доларот е понизок за околу 0,578 отсто.
