Британската влада проценува дека, после бројните одложувања, ќе мора да потроши најмалку шест милијарди долари за спроведување на граничните процедури после Брегзит, објави денеска парламентарната комисија за финансии.
Британците изгласаа напуштање на Европската унија во 2016 година, но дури оваа година беа донесени нови правила за гранични контроли за да функционираат ланците на снабдување.
Првата фаза, која подразбира воведување на дополнителни сертификати, стапи на сила на 31 јануари.
Втората започна на 30 април со воведување на физички контроли во пристаништата. Третата, која вклучува декларации за безбедност, предвидена е за 31 август.
Комисијата наведува дека Владата проценила дека ќе и бидат потребни шест милијарди долари за 13 главни мерки кои би требало да овозможат проток на стоки преку границата и за унапредување на спроведувањето на овие мерки во иднина.
Владата пет пати ја одложуваше примената на целосната гранична контрола од завршувањето на преодниот период за напуштање на Унијата на 31 декември 2020 година.
Ова предизвика несигурност во деловната заедница, додаде трошоци за владата и пристаништата и ги зголеми ризиците за биосигурност во Британија, наведе Комисијата.
