Американскиот производител на авиони „Боинг“ продолжува да се соочува со проблеми. Последниот во низата е запирањето на пробните летови на новиот широкотрупен авион од серијата „777 Х“, откако компанијата откри дефект на делот кој ги поврзува моторот и трупот.
„За време на закажаната инспекција откривме компонента која не работи како што треба“, се вели во изјавата на американскиот воздухопловен гигант за француската новинска агенција АФП.
Од компанијата додадоа дека ќе го заменат неисправниот дел и ќе ги продолжат пробните летови кога авионот ќе биде подготвен за тоа. Фирмата на тој начин го потврди извештајот на порталот за воздухопловни вести „Ер Карент“ (The Air Current).
Се очекува новиот „777 Х“ да стане најголемиот светски двомоторен патнички авион.
Како што пренесува АФП, авиокомпаниите веќе нарачале повеќе од 500 вакви авиони, но тие се уште не се користени за комерцијални цели.
Останатите модели „777“ имаат проблеми, заради што лансирањето на три модели од серијата е одложено за 2025 година.
„Боинг“ во последниве години се соочи со бројни проблеми во поглед на безбедноста и контролата на квалитетот, откако беше вклучен во неколку скандали и инциденти.
Новиот притисок врз компанијата беше предизвикан од инцидент во јануари годинава кога „Боинг 737 – Макс 9“ на „Алјаска Ерлајнс“ принудно слета откако плоча на вратата падна среде лет.
Последниот случај од висок профил се случи пред околу три месеци, во мај, кога „Боинг 777-300 ЕР“ на „Сингапур Ерлајнс“ беше фатен во екстремна турбуленција над Мјанмар, на летот од Лондон до Сингапур. Поради ова дошло до нагло опаѓање на висината за 54 метри, а патниците што не биле врзани со сигурносните ремени биле силно исфрлени од седиштата во таванот на патничката кабина. Во несреќата загина 73-годишен Британец, а неколку други патници и членови на екипажот се здобиле со повреди на главата, мозокот и р’бетот.
Управувањето со компанијата на почетокот на месецот го презеде 64-годишната Кели Ортберг, која вети дека ќе ја врати довербата во производителот на авиони. Исто така најави дека ќе работи од Сиетл, каде што беше седиштето на компанијата се додека не се пресели во Чикаго во 2001 година. Ова треба да ја доближи фирмата до програмата за комерцијални авиони.
(Фото: „Боинг“ / Википедија)
