Во хрватските судови денеска почна т.нбел штрајк на судиите, кој Здружението на хрватските судии го нарекува мерки за предупредување поради недостаток на дијалог со извршната власт во врска со зголемувањата на платите и наведува дека во него ќе учествуваат две третини од првостепените судии.
„За време на белиот штрајк, кој ќе трае до 19 мај, судиите нема да работат во е-списите, нема да се врши регистрација на нови правни субјекти, решенија за наследство или развод на брак“, истакна претседателката на еден од загрепските ограноци на Синдикатот, Весна Хорват.
„Сепак, итните предмети ќе се решаваат без одлагање“, посочуваат од здружението на судии кое за мерките за предупредување одлучи на седницата на управниот одбор на 3 мај.
Тогаш беше најавено дека за време на траењето на „белиот штрајк“, судиите кои ги спроведуваат предупредувачките мерки ќе бидат на работното место и ќе извршуваат други работи во рамките на судиската должност во текот на целото работно време.
Но, ќе ги одложат „сите дејствија во првостепената постапка, освен во итни случаи во кои може да настане непоправлива штета“.
Исто така, во овој период ќе се одржуваат седници на советот во второстепена постапка, но решенија нема да се испраќаат освен за итни предмети.
Во здружението на судии очекуваат дека ќе ги поддржат 70 отсто од првостепените судии, а посочуваат и дека имаат поддршка од државните правобранители кои неодамна предупредија дека „материјалните права“ на судските службеници не се корегирани уште од 2009 година.
Откако беше повикано на „бел штрајк“, највисоката судска инстанца – Врховниот суд – потврди дека за „настанатата несакана ситуација“ во голема мера е одговорна извршната власт „со својата политика на наметнување на судската власт на бројни суштински и важни, а неповолни услови за живот и работа“. Посочуваат и дека при донесувањето на тие одлуки во целост било игнорирано мислењето на Врховниот суд.
Министерот за правда и администрација, Иван Маленица, пак, рече дека се свесни за проблемите со платите на судиите и другите судски службеници, нагласувајќи дека поради оваа причина иницирале измени на законот за плати на судиите и другите судски службеници.
Пред владината седница во четврток, Маленица рече дека министерството предлага зголемување на коефициентот и основицата за сите судски службеници и дека месечното зголемување на платата за првостепените судии ќе изнесува 513 евра.
Со предлогот на министерството, кој влегува во процедура, ќе се зголеми коефициентот за судските службеници од 3,54 на 4,21, основивата за сите судски службеници за 8 отсто, со додавање на одредени материјални права кои судиите досега ги немаа.
