Претседателот на Република Македонија, Ѓорѓе Иванов, придружуван од сопругата Маја Иванова, од денеска до 7-ми овој месец ќе престојува во работна посета на Кралството Шпанија, по повод учество на 28. Годишна сесија на форумот Кран Монтана, што се одржува во Барселона.
Иванов, како што информира неговиот Кабинет, ќе се обрати на официјалната сесија на отварање на форумот на тема „Каков свет за иднина? Стратегии за стабилност во непредвидливата средина-кон нов начин на управување.“
Темите на дискусиите на годишниот форум се фокусирани на производство на енергија, климатските промени, мигрантските промени, зајакнување на улогата на жената во општеството и можностите за соработна на Медитеранот, Африка и Блискиот Исток.
Во петок на сопругата на претседателот на Република Македонија, Маја Иванова, ќе и биде доделена наградата Златен медал на форумот Кран Монтана, за нејзините актовности, проекти и иницијативи од хуманитарен карактер.
Форумот „Кран Монтана“ е основан во 1986 година со цел да се обезбеди меѓународна соработка и поврзување на економските чинители на светстко ниво, како и да придонесе кон глобалниот економски раст, воедно обезбедувајќи стабилност, еднаквост и безбедност.
Активностите и настаните во рамки на Форумот се насочени кон создавање платформи кои ќе им овозможат на политички и бизнис лидери да ги зајакнуваат партнерствата и да развиваат нови можности за соработка.
Форумот тесно соработува со меѓународни институционални партнери, како агенциите на Обединетите нации, Европската унија и Советот на Европа.
