Судирот меѓу досегашниот претседател на самопрогласената Луганска Народна Република, Игор Плотницки, и министерот на полицијата Игор Комет се заврши со смена на власта. Нов претседател е Леонид Пасечник, министерот за државна безбедност на Луганската Република.
Соопштението емитувано во петокот вечерта, дека Плотницки дал оставка поради здравствени причини, не е точно, затоа што го сменија пучисти.
Плотницки го обвинија дека околу себе имал „украински шпиони“, што во еден таков момент сигурно е „најсилен аргумент“.
Од моментот кога е емитувана веста дека Плотницки го напушти Луганск и со лет во економска класа стигнал од Ростов во Москва, руските медиуми почнаа да истражуваат дали тоа значи негова смена.
Жителите на Луганската област дознаа за бегството преку руските телевизии затоа што пучистите ги завзедоа луганската ТВ и новинската агенција.
Портпаролот на Кремљ, Дмитриј Песков, им изјави на новинарите дека не е планирана средба со претседателот на Луганската Република.
Кремљ очигледно не сакал да се меша во судирот во Луганск, па Плотницки ја загуби битката.
Судирот меѓу Плотницки и министерот на полицијата Игор Комет се разгоре на 21 октомври. Тогаш Комет беше обвинет дека незаконски запоседнал туѓа куќа. На девети ноември претседателот Плотницки лично присуствувал на иселувањето на Комета од куќата. Веќе на 20 ноември Комет беше сменет. Но тој не се предаваше, па организираше пуч, а поводот или подобро речено оправдувањето му беше дека Плотницки, наводно, е опкружен со шпиони и петта колона од Киев. На крајот победија оние подобро вооружените и претседателот Плотницки заедно со најблиските соработници го напушти Луганск и тргна за Москва.
Смената на Плотницки во Луганската Република е интересна заради тоа што покажува каква борба се води таму за фотеља, дури и во моментите кога се заканува реална опасност украинската војска да влета во таа област, како што овие денови на пример, „исправувајќи ја границата“ освои две села во Доњецката Народна Република, и покрај примирјето.
Новиот претседател на Луганската Република, Игор Комет, вели дека ќе го продолжи курсот на реализација на договорите од Минск.
Комет до војната работеше во Службата за безбедност на Украина во Луганск, каде што беше на позицијата началник на Одделот за борба против шверцот. Во октомври 2014 година стана министер за Државна безбедност на Луганската Република.
Судирот меѓу Плотницки и раководството на полицијата траеше повеќе од една година откако беше уапсен министерот за енергетика, Дмитриј Љамин. Во август 2016 година под автомобилот на Плотницки беше поставен експлозив и по детонирањето тој беше тешко повреден, но успеа да се спаси. Еден месец потоа, во септември, во еден ден, под сеуште неразјаснети околности починаа родителите на Плотницки откако, наводно, се отруле од печурки.
Противниците на Плотницки тврдат дека тој морал да замине затоа што сета власт ја држел во свои раце, сметајќи дека има „силна поддршка од Москва“. Поранешниот мајор во артилеријата, кој меѓу првите тргна во војна во 2014 година, ја загуби последната битка. Шансите да се врати во Луганск засега му се теоретски. Во Москва велат дека во Луганската и во Доњецката Народна Република се самостојни во донесувањето на политичките одлуки.
