Цврстите сојузници на Израел, САД и Саудиска Арабија, апелираа вчера на Израел да го ублажи нападот врз Газа, откако најголем број Палестинци беа убиени за еден ден од почетокот на војната.
Американскиот претседател Џо Бајден, соочен со демонстрантите кои извикуваа „Веднаш прекин на огнот“, додека беше во посета на црквата во Чарлстон, Јужна Каролина, рече дека „тивко“ работи со израелската влада за да ја натера израелската војска да ги намали своите напади и „значително да излезе од Газа“.
Израелските сили вчера го бомбардираа источниот дел на јужниот град Кан Јунис и централниот дел на Појасот Газа.
Здравствените власти во Газа, со која управува Хамас, соопштија дека во текот на ноќта загинале 247 лица.
Военото крило на Хамас информираше дека неговите борци истрелале ракети врз израелскиот град Тел Авив како одговор на, како што ги нарече, „ционистичките масакри врз цивили“.
Американскиот државен секретар Антони Блинкен го посети регионот во обид да спречи војната меѓу Израел и Хамас да се претвори во регионален конфликт.
Тој треба да пристигне во Израел по еднодневната средба со лидерите на земјите од арапскиот залив.
Вчера Блинкен разговараше со официјални лица од Обединетите Арапски Емирати и Саудиска Арабија за да се обиде да најде излез од најкрвавото поглавје во повеќедеценискиот израелско-палестински конфликт.
Тоа е негова четврта мисија во регионот по смртоносните напади на 7 октомври на Израел од страна на милитантите на Хамас, на кои Израел одговори со започнување копнена офанзива во Газа.
Престолонаследникот на Саудиска Арабија, Мохамед бин Салман, ја истакна важноста од ставање крај на непријателствата во Газа и изнаоѓање пат кон мирот, објави саудиската државна новинска агенција СПА.
СПА наведува дека престолонаследникот, кој пред избувнувањето на војната го предводеше зближувањето на неговата земја и Израел, ја истакнал потребата од враќање на стабилноста и обезбедување на легитимни права на палестинскиот народ.
Високиот претставник на Европската унија за надворешна политика, Жозеп Борел, му се придружил на Блинкен во Саудиска Арабија, што е знак на меѓународна загриженост, оценува Ројтерс.
(Фото: АП)
