– Рекорден број апликации, 487 или два до три пати повеќе од лани се доставени на повикот за комерцијализација на иновации. Како што рече денеска директорот на Фонодт за иновации и технолошки развој (ФИТР), Јован Деспотовски, оваа бројка на апликации се однесува само за еден инструмент за разлика од лани кога беше вкупна за четири инструменти.
Ова е прв јавен повик што го реализираше Владата заедно со Светска банка со комбинирани средства. Досега програмите беа одвоени. До 2017 година беа исклучиво од Светска банка, а од лани стартувавме со план од економски раст кој го реализираше Владата, потсети Деспотовски.
Вкупниот планиран обем на инвестиции од инструментот за комерцијализација што ги доставија фирмите беше околу 105 милиони евра. Од нив 70 беа побарувани од Фондот, а 35 милиони од сопствено кофинансирање на компаниите. Во процесот на евалуација, бројките се менуваат, согласно препораките за реструктуирање на буџетите што ги дава Комитетот и намалување на одредени ставки.
– Во моментов, во просек, од целото наше портфолио од 40-тина милиони евра, односот на кофинансирање е 55:45. Тоа значи дека речиси за секое евро што го дава државата компаниите вложуваат свое евро, потенцира директорот на Фондот.
