Собранието на Македонија денеска ќе ја одржи 88. седница, на која пратениците ќе дискутираат за предлогот за избор на Ристо Пенов за министер за локална самоуправа.
Пенов е предложен за ова место откако досегашниот министер Горан Милевски на 20 септември годинава поднесе оставка од функцијата од лични причини.
На оваа пленарна седница, пратениците ќе дискутираат и за предлозите за избор на судии на Уставниот суд, како и за Предлог законот за изменување и дополнување на Законот за здруженија и фондации, по скратена постапка.
На дневен ред се и Предлог одлуката за прераспределба на средства помеѓу буџетските корисници на централната власт и помеѓу фондовите, Предлогот за изменување на Одлуката за разрешување и именување на претседател и членови на Одборот за доделување на државната награда „22 Ноември”, Предлог законот за ратификација на Договорот помеѓу Владата на Македонија и Советот на министри на Албанија за соработка во областа на дијаспората, Предлог законот за ратификација на Рамковната спогодба за финансиско партнерство помеѓу Европската комисија и Македонија за посебните постапки за спроведување на финансиска помош според Инструментот за претпристапна помош (ИПА III).
Пратениците треба да ги разгледаат и предлозите за изменување на законите за земање и пресадување на делови на човечкото тело заради лекување, за јавно здравје, за безбедност на козметичките производи, за хемикалии, за репродуктивен материјал од шумски видови дрвја.
