Рускиот парламент изгласа зголемување на даноците за лицата означени како „странски агенти“, статус што се користи за прогон на дисидентите, јави ДПА.
Во иднина, тие ќе мора да плаќаат највисока даночна стапка од 30 отсто, наместо просечната од 13 отсто до 22 отсто.
„Оние кои ја предадоа нашата земја, не треба да добиваат даночни олеснувања“, напиша претседателот на Државната дума, Вјачеслав Володин, на апликацијата Телеграм.
Терминот „странски агент“ руските власти го користат од 2012 година за стигматизирање на опозициски личности и други дисиденти. Благодарение на низа законски измени, Министерството за правда веќе не е должно да обезбеди докази дека дадено лице примало финансирање од странство за да го означи како странски агент, наведува ДПА.
Моменталниот список вклучува повеќе од 1.000 организации и лица обвинети дека се „под странско влијание“.
Лицата означени како „странски агенти“ се соочуваат со тешки последици, вклучувајќи забрана да се кандидираат или да набљудуваат избори. Исто така, им е забрането да работат за државни институции и им се ускратуваат приходите од кирии или камати на штедни сметки, како и авторски хонорари или други приходи од интелектуална дејност.
Кога даваат јавни изјави, вклучително и објавување на социјалните мрежи, тие мора јасно да се идентификуваат како „странски агенти“, во спротивно им се изрекуваат високи казни.
