„Приемот на Украина во НАТО може да доведе до Трета светска војна“, изјави утринава во интервју за државната новинска агенција ТАСС, заменик-секретарот на Советот за безбедност на Руската Федерација, Александар Венедиктов.
„Киев е свесен дека таков чекор би значел загарантирана ескалација на Трета светска војна“, рече Венедиктов. Исто така, тој го повтори и руското мислење дека Западот, помагајќи ѝ на Украина, е „директна страна во конфликтот“.
Украинскиот претседател, Володимир Зеленски, најави изненадувачка кандидатура за брзо членство во воениот сојуз на крајот на септември, откако претседателот на Русија, Владимир Путин, одржа церемонија во Москва на која четири делумно окупирани региони прогласи за припојување кон руската држава.
Да потсетиме, Њујорк, три четвртини од 193-те членки на Генералното собрание (143 земји) денеска гласаа за резолуција која потегот на Москва го нарече незаконски, продлабочувајќи ја меѓународната изолација на Русија, четири земји беа на руска страна (Сирија, Никарагва, Северна Кореја и Белорусија), а триесет и пет беа воздржани, меѓу нив и Кина, додека останатите не гласаа.
Зеленски на Твитер напиша дека е благодарен на државите кои ја поддржаа „историската резолуција“ на Генералното собрание на ОН.
„Светот го кажа својот збор – рускиот обид за анексија е безвреден и никогаш нема да биде признаен од слободните нации“, напиша тој.
Во Брисел овеќе од 50 западни земји се состанаа за да ветат поголема воена помош за Украина, особено оружје за противвоздушна одбрана, по тешките напади кои оваа недела ги нареди Путин, како одговор на експлозијата на мостот на Крим.
Ветувањата на сојузниците ја вклучија и најавата на Франција дека ќе испорача радари и системи за противвоздушна одбрана на Украина во наредните недели. Британија вети противвоздушни ракети, а Канада соопшти дека, меѓу другото, ќе обезбеди и артилериски ракети.
