Социјалдемократите денеска на вонредните внатрепартиски избори избираат нов претседател на партијата. Гласањето ќе се одвива по електронски пат.
Вкупно 51.228 активно регистрирани членови на СДСМ ќе изберат еден од тројцата кандидати: Димитар Ковачевски, Фросина Ременски и Јован Деспотовски.
Еден од нив ќе го заземе местото на досегашниот претседател на партијата, Зоран Заев, кој даде оставка по неуспехот на локалните избори.
Гласањето на денешните вонредни избори се одвива на 194 избирачки места низ општинските организации ширум државата, почнувајќи од 8 часот наутро, се до 19 часот попладне. Гласањето е тајно, со заокружување на редниот број на еден од тројцата кандидати кои се наоѓаат на гласачкото ливче.
Непосредните внатрепартиски избори следуваат по оставката на претседателот на СДСМ и премиер во заминување Зоран Заев која беше констатирана на седницата на Централниот одбор на партијата одржана на 26 ноември. Оставката ја најави ноќта на 31 октомври, како чин на политичка одговорност по поразот на локалните избори, губејќи го и главниот град и повеќето скопски општини.
СДСМ по вторпат годинава оди на внатрепартиски избори за лидер и тоа по само девет месеци откако, наместо на конгрес, со статутарни измени се предвиде непосредно гласање на целото членство за највисоката партиска функција.
Да не ја најавеше Зоран Заев оставката на лидерската функција, вторите внатрепартиски избори ќе требаше да се одржат во 2025 година, до кога, поради новонастанатата ситуација, веројатно ќе трае и мандатот на петтиот претседател на СДСМ кој ќе биде избран денеска.
Заев не е првиот претседател на СДСМ кој поднел оставка на функцијата. Пред него, тоа го направи Бранко Црвенковски во 2004 година, повлекувајќи се среде мандат и од лидерската и од премиерската функција, за да се кандидира за претседател на државата, а четири години подоцна од лидерското место се повлече и Радмила Шекеринска, по поразот на тогаш опозициските социјалдемократи на предвремените парламентарни избори во 2008 година.
Заев првпат беше избран за лидер на СДСМ во 2013 година, на конгрес на кој имаше двајца противкандидати, а дојде на чело на партијата од позиција на градоначалник на Струмица.
