Извршниот одбор на СДСМ одлучи да нема предвремени парламентарни избори, заедно со претстојните претседателски избори, како што бараше опозицијата. Одлуката како што велат од партијата е донесена во интерес на граѓаните и државата.
„Граѓаните бараат резултати во економијата, реформите и интеграциите. Државотворна партија на која на прво место и се интересите на граѓаните и државата, не мисли на предвремени парламентарни избори, дури и кога рејтингот и поддршката кај граѓаните е многу повисока од онаа на опозицијата, изјави по завршувањето на седницата на ИО на СДСМ, партискиот портпарол Костадин Костадинов.
Тој рече дека како одговорна Влада најавиле економска година, создавање силна економија која отвора шанса за сите.
„Економијата е раздвижена и стабилизирана. Платите растат, се зголемуваат инвестициите, се отворат нови работни места, се повеќе пари завршуваат кај граѓаните. Тоа е добра основа за засукување на ракавите и постигнување резултат што го бараат граѓаните, на се она што е потребно за подобар живот и за подобар стандард. Веќе сме дел од НАТО, очекуваме датум за преговри со ЕУ и реализирање на потребните реформи. Одговорна партија, одговорна Влада не би ја загрозила таа шанса. Не би го загрозила датумот за преговои на ЕУ со предвремени парламентарни избори и стопирање на реформите, вели Костадинов.
Во однос на претстојните претседателски избори, тој вели дека тие ќе бидат кристално чисти, фер и демократски, на кои ќе победат граѓаните. Очекува победа на СДСМ и пораз на деструкцијата и блокадите на ВМРО-ДПМНЕ.
Извршниот одбор на СДСМ го овластил претседателот на партијата, генералниот и организацискиот секретар да направат консултации со коалициските партнери, други парламентарни и вонпарламентарни партии за да се дојде до консензуален кандидат за претседател на државата.
