Нотската бискупија на југоистокот на италијанскиот остров Сицилија им се извини на родителите откако минатата недела монсињор Антонио Сталиано на група деца им рекол дека Дедо Мраз не постои и дека неговиот црвен костим го избрала „Кока-Кола“ за да си го зголеми публицитетот.
Свештеникот Алесандро Паолино, директор за комуникации во Нотската бискупија, рече дека Сталиано со својата изјава сакал да го нагласи вистинското значење на Божиќ и додаде дека монсињорот сакал да укаже на приказната за Свети Никола, личноста која го инспирирала создавањето на Дедо Мраз.
Свети Никола бил епископ во Мира во Мала Азија. Тој е заштитник на децата, морнарите, девојчињата, сиромашните, студентите, фармацевтите, пекарите, рибарите, затворениците, трговците, патниците и болните и на Русија.
„Како прво, во името на бискупот изразувам жалење заради таа изјава која ги разочара децата и сакам да кажам дека намерите на монсињор Сталиано беа поинакви“, напиша Паолино во објавата на Фејсбук, на профилот на бискупијата. Паолино додаде дека монсињорот сакал децата да размислуваат за „вистинското значење на Божиќ“ и дека тој датум сега е поврзан со „консумеризам“.
„Ако од ликот на Дедо Мраз можеме да извлечеме некаква поука, назависно колку сме млади или стари, тогаш нека биде ова: што помалку подароци кои се „создаваат“ и „конзумираат“, а повеќе „подароци“ кои се споделуваат – се вели во соопштението на бискупијата.
Сталиано за „Ла Република“ изјави дека на децата не им кажал дека Дедо Мраз не постои, туку дека е потребно „да се направи разлика помеѓу стварното и измисленото, односно меѓу реалното и имагинарното“.
„Факт е дека Божиќ повеќе не им припаѓа на христијаните. Божиќните светилки и шопингот му го зедоа местото на Божиќ – изјави Сталиано.