Приватните автобуски превозници најавија дека изутринава од 06 часот ќе протестираат во главниот град. Нивните автобуси ќе бидат паркирани на три локации, на крстосницата кај ТЦ „Мавровка”, кај Црвен крст и по булеварот „Илинден”, во близина на Град Скопје, каде сообраќајот ќе биде целосно блокиран.
Протестот, како што информираа за МИА приватните превозници, е на неопределено време и ќе трае се до исполнување на нивните барања за исплата на долгот. Велат дека повеќе нема да бараат средби и очекуваат нив да ги контактираат за средби и за разговори. Ако тоа не се случи, најавија дека ќе останат на крстосниците во Скопје и за време на работни денови, викенди и празници.
Според приватните превозници, градоначалничката на Град Скопје Данела Арсовска треба да се извини за сите, како што велат, лаги и невистини пласирани во јавноста и во целост да го подмири долгот кон нив. Сметаат дека треба да се преговара за следниот оглас во услови, кои, како што велат, ќе бидат подобрени од оние кои се сега во моментов за приватните превозници и тие да не се најдат во неповолна ситуација.
Поради најавениот протест на превозниците полициски службеници од СВР Скопје денеска ќе преземат мерки за посебен режим на сообраќајот.
Посебниот режим на сообраќај ќе биде воспоставен на бул. „Илинден” – од крстосницата на бул. „Илинден” со бул. „Св. Климент Охридски”, до крстосницата од бул.„8 Септември” и бул. „Илинден” – крстосницата од ул. „11 Октомври” и бул.„ Кочо Рацин” (Црвен крст) и крстосницата од бул. „Гоце Делчев” и бул. „Крсте Мисирков” (Судска палата).
Секторот за внатрешни работи Скопје апелира до сите граѓани да ги почитуваат наредбите што ги издаваат полициските службеници по сообраќајниците каде што ќе се одвива настанот со цел безбедност на сите учесници во сообраќајот.
Од Град Скопје пред неколку дена соопштија дека го прекинуваат договорот со приватните превозници од „Слобода превоз” поради неисполнување на обврски што произлегуваат од договорот. Од Градот апелираа до превозниците да ја ревидираат одлуката за блокада на Скопје, бидејќи, како што велат, со тоа нема да постигнат решение за проблемот.
Градските власти најавија дека од следна недела ќе биде објавен јавен повик на кој ќе можат да се пријават сите приватни превозници, со цел поголема транспарентност на процесот и полесно разрешување на потенцијални проблеми.
В.д. директорот на Јавното сообраќајно претпријатие „Скопје” Александар Стојковски во интервју за МИА, кое беше објавено во саботата, изјави дека долгот кон приватните превозници го наследил кога стапил на функцијата пред шест месеци. Смета дека треба да се подмири, но најпрво да се утврди колкав е реалниот долг откако ќе заврши увидот направен од Финансиската полиција и Управата за јавни приходи.
„Со моето стапување на функцијата пред шест месеци во ЈСП, имаше долг кон приватните превозници. Во моето тековно работење, сите доспеани фактури што ни беа доставени од приватните превозници, се редовни исплаќани. Се работи за заостанат долг, којшто ние сакавме тековно пополека да го затвориме. Последната уплата е на 8 ноември. Последниот период направивме анализа, што мислам дека е обврска на секој директор кога ќе дојде да направи комплетна функционална и финансиска анализа на работењето на едно претпријатие. Дојдовме до сознанија дека последните пет години приватните превозници не уплаќале, односно не задолжувале никакви карти, а тоа е нивна обврска којашто е договорена односно јасен е член 5 од договорот меѓу ЈСП и приватните превозници, посочува Стојковски.
Стојковски ги отфрла како шпекулации информациите дека нема нафта за автобусите на ЈСП „Скопје” и тврди дека нема да има зголемување на цената на билетот без оглед на случувањата на глобално ниво со цената на нафтата. Тврди дека автобусите на ЈСП „Скопје” се технички исправни и најавува нови вработувања за возачи поради одлив на кадар по основ на пензионирање. Ветува и дека скопјани ќе добијат бесплатен јавен превоз. Според него, работите се ставени во мирување поради актуелната економска и енергетска криза, но дека се прават подготовки за да се реализира ветеното пред граѓаните на главниот град.
